Enkontru SEKOMS ho CCI-TL. Foto TATOLI: Rafy Belo

DILI, (TATOLI) – Sekretáriu Estadu Komunikasaun Sosiál (SEKOMS), ohin sorumutu ho CCI-TL (Camâra do Comércio de Timor-Leste) hodi rona preokupasaun ne’ebé setór privadu sira hasoru.

“Preokupasaun ne’ebé ohin CCI-TL ka emprezáriu sira hato’o mak dívida ne’ebé governu iha ho sira durante ne’e, katak governu seidauk seluk ezekusaun serbisu ne’ebé sira halo”, katak sekretáriu estadu Merício Juvinal dos Reis “Akara” ba jornalista sira iha sede CCI-TL, Acait, lorokraik ne’e.

Merício Akara katak SEKOMS hanesan orgaun ne’ebé tutela ba área komunikasaun, halo aprosimasaun mós ba CCI-TL hodi rona preokupasaun no ideia sira hodi masimiza liután komunikasaun hodi hakbesik programa governu nian ba setór privadu.

Nune’e, bainhira rona no iha informasaun bele mós hato’o fila-fali ba ministériu ka orgaun kompetente sira, hodi tau iha konsiderasaun.

Nia akresenta komunikasaun importante, tanba ne’e SEKOMS loke komunikasaun ho parseiru governu, liliu CCI-TL no setór públiku kona-ba programa governu.

“Ami hakarak komunika programa governu ho parseiru governu nian hotu. Iha tempu hanesan ami rona mós preokupasaun, ideia husi CCI-TL. Ohin ami iha konkordánsia katak komunikasaun sira hanesan ne’e importante”, tenik.

Governante ne’e akresenta governu hanesan reguladór no setór privadu hanesan parseiru ba dezenvolvimentu, presiza iha komunikasaun no entendimentu ba malu.

Entretantu, tuir observasaun TATOLI, CCI-TL ne’ebé lidera diretamentu husi emprezáriu Oscar Lima, inklui mós feto emprezáriu sira hato’o preokupasaun ligadu ho aspetu legál sira, burokrasia, inklui kauza no efeitu ne’ebé bele afeta direta ba funsionamentu atividade emprezariál iha Timor-Leste.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here