Prezidente Konsellu Konsultivu Fundu Petrolíferu (KKFP), Amu Júlio Crispim Ximenes Belo. Foto/Google.

DILI, (TATOLI) – Prezidente Konsellu Konsultivu Fundu Petrolíferu (KKFP), padre Júlio Crispim Ximenes Belo, hatete programa Governu Konstituisonál pasa ona no servisu ne’ebé agora halo mak konsentra ba Orsamentu Jerál Estadu 2018 ne’ebé kontempla mós gastu sira ne’ebé mak gasta husi janeiru mai to’o antes entrada Orsamentu Jerál Estadu (OJE) 2018.

“Programa Governu nia ne’e pasa ona ne’ebé laiha ona problema, Governu agora ne’e sira-nia servisu maka halo orsamentu jerál 2018, ida ne’e laiha tan kondisaun seluk, sira konsentra ba ida ne’e, ne’ebé maka kontempla mós gastu sira ne’ebé ita gasta. Ne’e duni kontempla hotu, hatama iha Orsamentu Jerál 2018 nian hodi lori mai iha Parlamentu atu halo aprovasaun depois lori bá Prezidente promulga no publika iha jornál repúblika no ita aplika osan ne’e ba fulan hirak ne’ebé falta to’o dezembru 31”, amu dehan iha Parlamentu Nasionál, ohin.

Relijiozu ne’e afirma bainhira OJE 2018 ne’e laiha maka labele aplika ona rejime duodesimál katak osan atu finansia mákina Governu laiha.

“Ne’e duni órgaun soberania Estadu sira tau matan ba situasaun ida ne’e. Orsamentu Jerál Estadu ne’e tenke iha no tenke aprova, promulga no publika, tama em vigor antes tinan ne’e remata, se laiha maka ita laiha orsamentu”.

Hatutan orsamentu duodésimu ne’e refere de’it ba orsamentu iha anu anteriór, entaun ba 2019 labele aplika ona tanba OJE 2018 laiha, tanba ne’e urjente no prioridade iha prioridade hotu Governu elabora hodi lori bá iha PN iha fulan ida ne’e.

Tuir kalendáriu ne’ebé fó sai husi Ministériu Finansa katak entre loron 1-3 agostu sei halo submisaun OJE 2018 ba PN.

“Se tuir kalendáriu ida ne’e natoon, se sira halo debate ida estraordináriu iha agostu klaran ne’e molok remata agostu Orsamentu Jerál Estadu ne’e bele aprova ona. Kuandu aprova ona ba Prezidente Repúblika iha fulan ida para promulga, se promulga de’it laiha tan problema ida iha setembru ita iha ona Orsamentu Jerál Estadu”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here