Voluntáriu “Corpo da Paz” EUA Remata Misaun Iha TL

0
121
Embaixadora Kathleen Fitzpatrick inklui autoridade timoroan sira balun, foto konjuntu hamutuk.

DILI, (TATOLI)-Voluntáriu “Corpo da Paz ka Peace Corps” na’in rua nulu resin ualu, husi Estadu Unidu Amérika (EUA), ne’ebé durante tinan rua hala’o misaun umanitária voluntária remata sira-nia misaun iha Timor-Leste (TL).

“Komunidade hadomi mai ha’u. Sira suporta ha’u bainhira ha’u mai no ho sira,” informa reprezentante membru “Corpo da Paz”, Rebecca Longhany, iha salaun Suai, Timor Plaza, Díli, Tersa loro kraik ne’e.

Nia konfirma mós ba Ajénsia TATOLI katak sei tranzmite esperiénsia di’ak sira ne’ebé mak durante nia aprende hamutuk ho komunidade, liuliu iha munisípiu Baucau.

“Iha ne’e (Timor-Leste) di’ak, ha’u sei fó hatene ha’u-nia belun sira iha Amérika. Katak, iha Timor ha’u aprende halo ligasaun ho komunidade,” dehan Rebecca Longhany.

Komunidade ida, nu’udar parseiru servisu ida ba Rebecca Longhany, Cipriano Freitas, haktuir katak durante membru “Corpo da Paz” ne’e serbisu ho sira, halo serbisu barak liubá edukasaun ba labarik, nutrisaun no saúde reprodutiva ba feto sira.

Komunidade ne’e mós demonstra nia sentimentu katak ho prezensa membru “Corpo da Paz”, nia inklui komunidade sente di’ak no kapás tebes basá bele fahe esperiénsia ba malu.

“Sira fó tempu barak liu ho ami liga ba área ne’ebé mak liga ba iha ami-nia serbisu nó mós liga ba iha kapasitasaun oinsá ita bele hatene kultura sira nian nó mós oinsá bele aprende kultura Timor nian,” hateten komunidade Cipriano Freitas.

“Sira la’ós hela de’it iha fatin de’it, maibé environment (ambiente) komunidade nian mós sira aprende,” reforsa tan komunidade ne’e hodi hakotu.

Voluntáriu “Corpo da Paz ka Peace Corps” na’in rua nolu resin ualu, husi EUA, ne’ebé durante tinan rua hala’o misaun umanitária voluntária remata sira-nia misaun iha TL ne’e hahú dezloka ba komunidade iha 20 Outubru 2016.

Altura ne’ebá, Embaixadora Amérika iha Timor-Leste, Karon Stanton afirma, voluntáriu sira ne’e sei ba hela hamutuk ho família sira iha Timor-Leste no aprende ba malu kultura no moris hodi hametin liu tan amizade entre povu Amérika no Timor-Leste.

“Voluntáriu amerikanu sira ne’ebé mai hela iha ne’e, sira mós bele aprende Timor-Leste nia situasaun husi família sira ne’ebé sira hela ba,” hateten Embaixadora, Karon Stanton.

Iha okaziaun ne’e, Eis-prezidente Repúblika, Dr. José Ramos Horta hateten, membru “Corpo da Paz” sira ne’e sei halo servisu komunitáriu ho voluntáriu, sira la’ós asesór internasionál ne’ebé simu osan, maibé hakarak tulun Timor-Leste tan ne’e simu sira ho di’ak no hatudu ita-nia karakter nu’udar timoroan.

Nia mós hatutan katak prezensa voluntáriu sira ne’e nu’udar meius ida katak sira sai ona embaixadór no promove Timor-Leste (TL) iha Amérika.

“Sira sai daudauk ona embaixadór ita-nian, bainhira sira fila, sira nia facebook, sira nia media, iha sira nia komunidade iha ne’ebá (Amérika), se ita simu sira di’ak, mensajen di’ak tebes ba publisidade. Ne’e di’ak tebes ba Timor-Leste,” Eis-prezidente, Ramos Horta akresenta tan.

Tan ne’e, Laureadu Nobel da Paz ne’e hameno ba komunidade no família ne’ebé voluntáriu sira sei ba hela iha aldeia no suku sira iha rurál katak tenke hatudu Timor-Leste nia ospitálidade, respeita ema, tratamentu di’ak.

Nune’e mós Xefe suku Dare, Abel dos Santos agradese tebes voluntáriu “Corpo da Paz” tanba durante tinan rua hela hamutuk ho sira, voluntáriu sira ne’e apoiu tebes komunidade Dare nian maski fofoun sira mai iha difikuldade, maibé ikus mai bele moris ho komunidade no toman ho sira hodi hala’o atividade komunidade nian.

Xefe suku Dare informa, durante tinan rua buat importante ne’ebé komunidade sira aprende husi voluntáriu sira ne’e mak sira nia Pontulidade no respeitu tempu, tanba tuir nia, iha Timor-Leste, pontualidade ka respeitu ba tempu sei iha difikuldade.

Programa “Corpo da Paz ka Peace Corps” nu’udar organizasaun naun-profit ne’ebé harii iha loron 1 Marsu 1961 husi Prezidente John F. Kennedy atu promove pás no amizade nó mós ajuda populasaun sira ho voluntáriu iha nasaun sira iha mundu.

Hahú husi tinan 1961 to’o 2015, amerikanu sira ne’ebé envolve iha programa ne’e kuaze rihun atus rua nulu resin no hala’o ona servisu voluntáriu iha nasaun atus ida haat nulu resin ida (141) inklui Timor-Leste.

Entretantu, iha misaun ikus voluntáriu “Corpo da Paz ka Peace Corps” na’in rua nulu resin ualu ne’e, voluntária ida idak aprezenta sira-nia atividade ne’ebé durante ne’e sira hala’o hamutuk ho komunidade, partilla esperiénsia kona-ba moris ho família ida idak ne’ebé sira hela ba liuhusi aprezentasaun no galeria.

Nune’e mós, hetan sertifikadu apresiasaun husi Embaixadora Kathleen Fitzpatrick inklui autoridade timoroan sira balun, depois remata ho foto konjuntu hamutuk.

Jornalista: Rafy Belo

Editór : Manuel Pinto

HUSIK IDA HATÁN