TL Prepara Hela Kondisaun Dada Kadoras Mai TL

0
305
Primeiru-Ministru aprezenta programa governu iha Parlamentu Nasionál.

DILI, (TATOLI) – Primeiru-Ministru, Taur Matan Ruak, hateten Governu prepara hela kondisaun hanesan Programa Petro Kímika iha Betano (Manufahi) no Beaço (Vikeke), auto estrada, aeruportu nomós supply base atu dada kadoras Greater Sunrise mai Timor-Leste (TL).

“Kondisaun ne’ebé ita prepara iha objetivu ida de’it oinsá maka atu lori kadoras Greater Sunrise mai Timor-Leste. Ha’u fiar loos katak nia (kadoras) sei mai”, Taur hato’o kestaun ne’e bainhira aprezenta Programa Governu Da-Ualu Konstitusionál ba loron daruak nian iha plenária Parlamentu Nasionál, kinta ne’e, hafoin hatán deputadu opozisaun sira nia preokupasaun kona-ba promesa atu dada kadoras mai TL.

Nia dehan Governu ne’ebé nia lidera sei halo esforsu para kadoras mai duni, tanba ida ne’e sei fó vantajen maka’as loos ba nasaun ida ne’e, liu-liu ba sidadaun sira nomós aumenta reseita ba kofre Estadu.

Iha biban hanesan, Eis Vise Primeiru-Ministru ba asuntu Delimitasaun Fronteira nomós atuál Ministru Prezidénsia Konsellu Ministru, Agio Pereira, tenik asuntu Greater Sunrise ne’e timoroan nian hotu implísita iha preokupasaun sustentabilidade finanseira no situasaun ekonomia sosiál.

Nia esplika hafoin asina tratadu Greater Sunrise ho Austrália, efeitu asinatura tratadu ne’e maka hahú kedas negosiasaun téknika kona-ba Greater Sunrise.

“Buat ida ne’ebé maka tratadu elimina tiha maka Floating LNG (esplorasaun iha tasi leten). Tratadu ne’e fó opsaun rua de’it maka gajedutu (kadoras) ba Darwin (Austrália) no mai iha Beaço (Timor-Leste). Maibé, Timor-Leste nia polítika estratéjika ba dezenvolvimentu nasionál maka ita defende kadoras mai iha kosta súl”, tenik.

Jornalista: Xisto Freitas

Editora: Rita Almeida

HUSIK IDA HATÁN