Timor-Leste Sei Iha Eventu Korrida Ró Husi Darwin-Dili no Oekusi

0
110
Konferénsia impresa ne’ebé organiza husi MTKIA relasiona eventu korrida ró Darwin-Dili no Oekusi. Foto/MTKIA.

DILI, (TATOLI)- Timor-Leste iha kooperasaun ho Cruising Yacht Association Northern Territory, Austrália, sei halo eventu desportivu korrida Ró husi Darwin-Dili no Oekusi ne’ebé maka sei partisipa husi ró sanulu.

Abertura ba atividade ne’e sei hala’o iha Darwin iha 14 jullu 2018 tuku 10:00 ne’ebé mak sei halo ba ró hitu no tolu seluk sei halo iha fatin seluk, maibé nia konsentrasaun hamutuk iha Dili.

Diretór Jerál Turizmu, José Filipe Dias Quintas, hatete objetivu prinsipál husi eventu ne’e mak atu promove turizmu marítima liuliu ba iha merkadu Austrália nomós sei lori benefísiu ekonomia ba komunidade lokál tanba iha serimónia ne’e Ministériu Turizmu, Komérsiu, Indústria no Ambiente (MTKIA) sei organiza mini feira ba maluk sira ne’ebé atu fa’an produtu lokál.

“Nomós atu hametin kooperasaun ho ita-nia nasaun viziña tanba Governu Austrália liuliu Northern Territory fó apoia másimu ba eventu ida ne’e”, Quintas hato’o iha konferénsia imprensa ne’ebé hala’o iha Sentru Konvensaun Dili, ohin.

Koordenadora ba eventu ne’e, Carmen Joela Pereira, hatete MTKIA halo mós kooperasaun ho unidade trilaterrál Timor-Leste, Indonézia no Austrália (TIA), Asosiasaun Sail Timor-Leste, Imigrasaun, Alfándega, Unidade Polísia Marítima, Navál, Diresaun Nasionál Kuarentena, Saúde, APORTIL, Diresaun Nasionál Transporte no Marítima, Seguransa Sivíl no Administrasaun Munisipál Dili hodi asegura eventu ida ne’e la’o ho sesesu.

“Ró sei mai hamutuk sanulu, maibé hitu mak sei tuir abertura iha Darwin no tolu ne’e sei mai husi fatin seluk no sei halibur malu iha Dili. Ró sira ne’ebé mai ho nia tipu médiu, ki’ik nomós boot ho tipu ne’ebé bolu multihull, monohull no kruzeiru”.

Hatutan antes eventu ne’e hahú ekipa husi ministériu relevante sei arranka bá Darwin atu tuir enkontru tékniku nian (technical meeting) hamutuk ho tripulante sira iha loron 10 jullu ne’e atu esplika kona-ba lala’ok ró sira ne’e atu mai oinsá hodi bele asegura to’o destaka iha tasi-ibun ho di’ak.

“Abertura hahú iha dia 14 tuku 10, kuandu ró hahú mai ona depende tuir anin, maibé balun ne’ebé ho kapasidade boot loron ida ka rua sira iha ne’e ona. Bainhira to’o iha ne’e husi komisaun organizadora sei prepara fali serimónia ba sira atu entrega prémiu ba sira ne’ebé mak manán no sei halo iha Sentru Informasaun Turístika iha loron 19 tuku haat loraik”.

Depois de serimónia entrega prémiu ba vensedór korrida husi Darwin-Dili no iha 24 jullu sei kontinua halai taru ró segunda via nian ne’e bá Oekusi no sei halo mós serimónia fó prémiu iha fatin ne’e hafoin ró sira ne’e filafali halo sira-nia atividade iha fatin seluk ka fila ba sira rai.

Xefe Unidade Misaun TIA, João Gonçalves, hatete unidade misaun ba dezenvolvimentu ekonómiku sub-rejionál integradu entre Timor-Leste, parte leste Indonézia no norte Austrália envolve iha atividade hanesan ne’e.

“Eventu ne’e istóríku ida ne’ebé hahú kedan iha tempu Portugés no ohin loron ita sei kontinua nafatin no tinan ba tinan ita buka atu halo di’ak liu no boot liután, maski dala balun ita iha obstákulu, maibé ita sempre buka oinsá atu ultrapasa difikuldade ne’ebé enfrenta para eventu sai realidade tanba eventu ne’e internasionál ne’ebé promove ita-nia rai doben ba iha liur nomós buka atrai turista mai Timor-Leste”.

Eis governante ne’e dehan Governu daudaun esforsu an atu dezenvolve setór prioritáriu seluk tanba atu halakon dependénsia ba iha fundu minarai no setór turizmu parte ida ne’ebé Governu hili tiha ona nu’udar setór prioridade para dezenvolve.

“Unidade misaun iha duni planu ida hodi promove no fomenta interkámbiu kulturál, desportivu, rekreativu iha sub-rejiaun ne’e nia laran. Tanba ne’e mak iha tinan rua liubá ami konsege inklui ona Oekusi mós iha eventu ida ne’e no ami hanoin aban-bainrua ita bele estende ba sub-rejiaun, ita bele halo mós to’o iha Kupang”.

Nune’e TIA sempre apoia inisiativa hanesan ne’e no hein katak populasaun tomak sei akompaña eventu ne’e no liuliu iha Dili bele asiste entrega prémiu ba manán-na’in sira.

Kompetisaun ida ne’e halo tama ona ba dasiak nian ne’ebé konta kedan dezde tempu kolonializasaun Portugés iha agostu 1973 mai to’o ohin loron iha Oitavu Governu Konstitusionál nian.

Atividade korrida ró ne’e mai husi inisiativa maluk australianu sira-nian iha Darwin no hetan koordenasaun di’ak no apoia husi autoridade Timór-Portugés iha tempu ne’ebá no sai atividade desportu tasi nian ne’ebé australianu sira halo ba rai estranjeiru.

Eventu ne’e mós sei sai sasin ba lasu kulturál no istóriku ne’ebé povu rai rua ne’e iha dezde funu mundiál daruak ne’ebé timoroan sira subar tropa australianu husi forsa oukupasaun japonés iha territóriu Timór.

Atu fasilita eventu ne’e susesu Ministériu Turizmu iha Governu anteriór tau ona orsamentu rihun 50 resin. Husi montante ne’e aloka ba selu prémiu ba manán-na’in sira no atu apoiu viajen ekipa téknika ne’ebé sei bá Darwin. Aleinde apoia husi Timor-Leste, Governu Norte Territóriu tulun mós finaseiru no tékniku liuhusi Cruising Yacht Association nune’e tinan-tinan eventu ne’e la’o nafatin.

Jornalista : Maria Auxiliadora

Editór : Manuel Pinto

HUSIK IDA HATÁN