SEKOMS-Embaixadór Austrália Hasoru Malu Ko’alia Dijitalizasaun Mídia

0
113
SEKOMS-Embaixadór Austrália Hasoru Malu Ko’alia Dijitalizasaun Media

DILI, (TATOLI) – Sekretáriu Estadu Komunikasaun Sosiál (SEKOMS) hasoru malu pré-limináriu ho embaixadór Austrália iha Timor-Leste, Peter Roberts, hodi ko’alia kona-ba oinsá halo no apoiu dijitalizasaun ba mídia sira iha TL.

“Austrália hanesan ita-nia parseiru importante, nasaun viziñu ne’ebé mak besik liu ita, sira hatudu sira-nia comitmento (kompromísiu), vontade, atu kontinua hodi halo kolaborasaun di’ak ho ita, ho governu, liliu mós iha área komunikasaun”, hatete Sekretáriu Estadu komunikasaun sosiál, Merício Juvinal dos Reis “Akara”, ba jornalista sira iha palásiu governu, ohin, hafoin hasoru malu.

Sekretáriu Estadu Merício “Akara” mós hatutan sorumutu ne’e ko’alia kona-ba nesesidade sira iha área transmisaun nian.

“Ha’u hanoin presiza regulamentu, lei balun ne’ebé mak seidauk, ita koko haree para bele iha hanesan broadcasting law“.

Nia hatutan tan : “Ita fasilita oinsá di’ak liu iha era modernu sira hanesan ne’e, komunikasaun mós presiza avansa, iha sistema ne’ebé mak dijitál liu, modernu liu; ida ne’e ba oin. Ida ne’e mak maizumenus pontu balun ne’e mak ne’ebé ami haree”.

“Iha tempu hanesan, oinsa ita bele koñese malu di’ak liu, ita hatene, embaixadór mós presiza hatene saida mak prioridade iha setór komunikasaun sosiál, saida mak sira-nia programa durante kooperasaun iha Timor para ita haree to’ok parte ne’ebé ita bele halo kooperasaun”, tenik.

Akara mós katak vizita embaixadór Peter Roberts ne’e nu’udar vizita prelimináriu ida tanba sei iha vizita no enkontru seluk ne’ebé mak produtivu.

“Sei iha enkontru seluk ne’ebé mak pozitivu la halimar; ne’ebé mak ita koko ko’alia saida mak ita apoia malu hodi dezenvolve di’ak liu meius komunikasaun sira, para públiku, povu iha área rurál bele asesu informasaun di’ak liu husi Estadu, governu iha tempu hanesan, sira bele dezenvolve ho efetivu liu para povu iha karaik bele mós pasa sira-nia hanoin, perspetiva para ita-nia governu bele rona”, dehan Akara.

Sekretáriu estadu ne’e hateten tan sei hasa’e mós kapasidade media sira nian liuhusi atividade interkámbiu.

“Embaixadór mós mensiona buat balun katak sei iha exchange (interkámbiu), ita-nia media ba iha ne’ebá (Austrália). Buat sira hanesan ne’e, iha rekursu umanu, halo formasaun; haree to’ok oinsa maksimiza, dezenvolve rekursu umanu”, dehan governante ne’e.

Embaixadór Peter Roberts, iha fatin hanesan, konfirma ba profisionál komunikasaun sosiál sira katak agora tama ona iha era dijitalizasaun, nune’e ema barak uza internet no smartphone atu suporta programa dezenvolvimentu.

“Entaun hakarak halo kooperasaun di’ak ho governu foun no sekretáriu estadu foun iha área ne’e”, subliña embaixadór australianu ne’e.

Bele mós asesu iha link ne’e: https://www.youtube.com/watch?v=eQRzdfn1dvg

Jornalista: Rafy Belo

Editora: Rita Almeida

HUSIK IDA HATÁN