DILI, (TATOLI) – Prezidente-Repúblika (PR), Francisco Guterres Lú Olo, husu ba deputadu sira iha Parlamentu Nasionál (PN) atu uza mekanizmu ne’ebé lais liu atu hasai orsamentu Estadu.
“Prezidente-Repúblika apresia ha’u nia aprezentasaun no Prezidente mós hato’o mensajen ba deputadu sira relasiona atu halo levantamentu ba orsamentu para priénse duo-desimál.
Prezidente sujere se bele buka meius ne’ebé lais liu nune’e bele foti orsamentu atu sustenta nesesidade Estadu, liu-liu pagamentu saláriu ba funsionáriu sira”, haktuir Prezidente PN, Arão Noé de Jesus, ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin relata ba Prezidente-Repúblika katak Governu aprezenta ona Proposta Lei Rejime Espesiál atu halo levantamentu ba fundu petrolíferu hodi priénse duo-desimál ba fulan rua nian (jullu-agustu) hodi sustenta mákina Estadu molok aprovasaun orsamentu jerál Estadu tinan 2018 nian.
Arão hateten sira sei tau konsiderasaun ba Xefe Estadu nia sujestaun ne’e, nune’e bele aselera prosesu foti orsamentu atu labele impede mákina Estadu.
“Tuir kálkulu, Governu presiza hasai orsamentu purvolta miloens $70 kada fulan durante fulan rua”, Arão katak.
Nia mós aprezenta ba Xefe Estadu kona-ba PN hatún ona Projetu Lei Antí Korupsaun ba Komisaun A trata asuntu Justisa atu deskuti ho prazu loron 30 atu Komisaun refere bele hato’o relatóriu no pareser ba plenária.
Prezidente orgaun lejislativa ne’e esklarese konteúdu hosi Projetu Lei Antí Korupsaun ne’e reafirma fali artigu sanulu resin iha Kódigu Penál ne’ebé ko’alia Kona-ba krime no aumenta mós krime foun rua kona-ba responsabilidade kriminál ba ema sira ne’ebé kaer projetu laiha kualidade nomós asaun ba enrekesimentu ilísitu.
“Krime foun rua iha Projetu Lei KAK ne’e presiza debate halo kle’an liu, tanba iha interpretasaun balun mosu katak bele akontese inkonstitusionalidade (liu-liu iha enrekesimentu ilísitu)”, tenik.
Jornalista: Xisto Freitas
Editora: Rita Almeida
