PNUD Halo Diskusaun Ho Mídia Profisionál

0
41

DILI, (TATOLI) – Programa Nasaun Unida ba Dezenvolvimentu (PNUD) halo diskusaun ho mídia sira iha Timor-Leste, partisipasaun akadémika no espesialista relevante kona-ba edukasaun, abilidade no dezenvolvimentu ekonómiku iha Otel Novo Turismo, kalan ne’e.

Atividade ne’e nu’udar meius reforsa relasaun entre Organizasaun Nasaun Unida (ONU) ho TL no mídia sira hodi kria plataforma informál atu fahe informasaun no tópku ho kestaun xave sira. Eventu ne’e atu ajuda mídia halo kobertura kona-ba asuntu dezenvolvimentu iha TL.

Diretór Nasionál ba Parseria no Kooperasaun, Ministériu Edukasaun, Fernando de Araújo, hateten mídia pilar importante, papel hanesan kontrolu sosiál no moris iha sosiedade atu ajuda sosiedade sai maduru, ekonomikamente di’ak no dezenvolve edukasaun através informasaun ne’ebé mak mídia fó inklu ajuda bele dezenvolve sira-nia moris.

“Sira konvida ha’u envolve iha diskusaun ne’e, tópiku ligadu ho kualidade edukasaun. Diskusaun ne’ebé mais profunda oinsá mídia nia papel atu apoiu, ajuda kualidade edukasaun”, katak Fernando de Araújo ba jornalista sira.

Tuir Fernando kobertura mídia sei dezafia polítika sira, la’ós krítika de’it maibé ho faktu sira ne’ebé aprezenta bele sai referénsia atu polítiku sira nomós entidade, intreveniente sira ne’ebé mak serbisu iha parte edukasaun bele solusiona asuntu ne’ebé relevante ba opiniaun públiku.

“Ha’u interesante tebes ba diskusaun ne’e, tanba iha mós informasaun ne’ebé mak fó kestaun barak kona-ba kualidade edukasaun”, dehan tan.

Diretór Fernando de Araújo realsa sistema ensinu ne’ebé Timor-Leste introduz la’ós aat liu, la’ós mós di’ak liu, iha país sira iha mundu nomós iha rejiaun Ázia.

Basá, tuir nia fevereiru tinan ne’e TL hola parte iha kongresu rejionál ne’ebé organiza husi Malázia. TL nia partisipasaun ho estudante na’in neen (husi eskola rua) halo peskiza no aprezentasaun ba área ekonomia no sustentabilidade ne’ebé estudante rasik elabora, dezenvolve no halo aprezentasaun perante país membru ASEAN (Associations of South East Asian Nation) ninian, tama entre dez melhores, liliu iha matemátika.

“Siénsia mak laduun. Signifika iha andamentu, defaktu ita haree buat barak sei menus  fasilidade, kondisaun eskola, ne’e razoável. Kestaun sira ne’ebé mak mídia sira hato’o preokupasaun, ne’e preokupasaun sosiedade ninian, hakarak espresa para ita haree, iha futuru governu bele tau-matan”.

Reprezentante PNUD, Roy Trivedy, hatutan atividade ne’e regularmente, konvida mídia sira hala’o diskusaun ho asuntu oioin, ajuda dezenvolve koñesimentu no kapasidade jornalista timoroan sira.

“PNUD sei haree asuntu relevante sira hodi halo diskusaun hamutuk ho jornalista sira ho regular, iha fatin ketaketak, hodi esplora ideia pozitiva nune’e ajuda dezenvolve mós koñesimentu no kapasidade jornalista sira nian”, afirma.

Entretantu diskusaun entre PNUD ho mídia profisionál sira nu’udar faze dahuluk no tuir informasaun sei hala’o regularmente.

Jornalista: Rafy Belo

Editora: Rita Almeida

HUSIK IDA HATÁN