PN Hahu Debate Pedidu Urjénsia Proposta Governu Ba Levantamentu FP

0
342
Prezidente Parlamentu Nasionál, Arão Noé de Jesus Amaral.

DILI (TATOLI)—Parlamentu Nasionál, ohin, hahú debate kona ba pedidu urjénsia proposta governu da-ualu atu halo levantamentu Fundu Petrolíferu (FP) hodi garante funsionamentu mákina estadu, tanba daudaun ne’e saldu iha tezouru Governu nian iha situasaun risku.

Ministru reforma lejizlativa no asuntu parlamentár, Fidelis Magalhães esplika razaun governu halo pedidu urjénsia tanba governu konxiente katak, lei hatete governu la bele foti osan hosi Fundu Petrolíferu sein autorizasaun Parlamentu Nasionál, tanba ne’e mak governu husu autorizasaun ba Parlamentu Nasionál, ho pedidu urjénsia.

“Estadu iha likidés 20 millions dolar Amerikanu de’it. Tanba ne’e, governu husu Parlamentu Nasionál (PN) atu autoriza 140 millions dolar Amerikanu atu finansia mákina estadu, iha fulan Jullu ho Agostu,”   Ministru Fidelis Magalhães  esplika iha plenária, Parlamentu Nasionál, Ohin.

Iha fatin hanesan Ministra Finansas, Sara Lobo Brites, reforsa katak; Ministériu Finansas (MF) agora enfrenta difikuldade atu asegura pagamentu, tanba ne’e, governu mai ho proposta ida ho osan hamutuk 140 millions hosi fundus Fundu Petrolíferu.

“Osan 140 Millions ne’e,  millions 60 ne’e governu utiliza atu selu uluk saláriu vensimentu, pensaun eis-titular, veteranus, despeza embaixada nian, servisu ospitálar nasionál, munisípiu, no SAMES. Uza atu asegura pagamentu ba kombustivel sentrál eletrisidade iha Betanu no Hera, inklui selu projetu infraestrutura, no pagamentu ba ZEESM, ho pagamentu ba bolseiru,” Vice Ministra Finansas, Sara Lobo Brites esplika.

Enkuantu deputadu FRETILIN, Antonino Bianco konsidera pedidu governu la tama iha karater urjénsia ho razaun lei jestaun finanseira fó dalan governu uza osan duodecimo. Nune’e nia husu ba Prezidente PN atu retira proposta governu nian.

Hanoin seluk mós mai hosi deputadu apoiante Governu, Aderito Hugo (CNRT) konsidera iha dalan atu oitavu governu husu pedidu urjénsia ba parlamentu nasionál, tanba governu ne’e, iha forsa maioria iha parlamentár.

“Governu ida ne’e ho apoiu maioria parlamentár tanba ne’e, la sala governu husu pedidu ho karater urjénsia atu foti osan hosi Fundu Petrolíferu. Governu mós hatene katak dalan iha parlamentu bele tanbasá mak la bele mai husu,” Aderito reforsa.

Entretantu To’o notísia ne’e tun deputadu/a sira sei debate hela kona ba proposta governu ne’e urjénsia ou lae, hafoin hetan ona aprovasaun foin hakat ba debate jeneralidade no espesialidade ba proposta lei governu ho númeru 1/V/I.

Jornalista : Julia Chatarina

Editór : Manuel Pinto

HUSIK IDA HATÁN