DILI, (TATOLI) – Primeiru-Ministru (PM), Taur Matan Ruak, hateten nia ho Aliansa Mudansa ba Progresu (AMP) ne’ebé sustenta Governu Da-Ualu Konstitusionál sei haree opsaun ne’ebé Prezidente-Repúblika prefere ba lista membru Governu sira ne’ebé seidauk simu pose.
“Prezidente-Repúblika husu para ami, liu-liu Primeiru-Ministru ho AMP ne’ebé suporta Governu ne’e atu haree opsaun no ami sei halo ida ne’e”, Taur hato’o ba jornalista sira iha Palásiu Prezidente Nicolau Lobato, Bairru Pité, kinta ne’e hafoin enkontru ho Xefe Estadu, Francisco Guterres Lú Olo.
Taur katak sira sei lori mensajen ne’e ba AMP para bele lori fali proposta ka opsaun ba Prezidente-Repúblika.
Xefe Governu dehan hotu-hotu hein saida maka sei akontese, tanba desizaun ikus ka lia-fuan ikus sempre iha Prezidente-Repúblika nia liman.
Biban ne’e, Xefe Ezekutivu mós dehan aban (sesta) loraik, Governu sei aprezenta programa ba Parlamentu Nasionál atu estuda molok debate iha plenária.
“Prazu ne’e monu iha domingu (22/7), entaun ami hakarak haruka ba Parlamentu Nasionál antes”, akresenta.
Taur afirma Governu Da-Ualu Konstitusionál hakarak halo buat hotu para bele fó kontribuisaun durante tinan lima atu kumpri buat ne’ebé sira promete iha kampaña. “Maske ho difikuldade sira ne’e, ami sei halo esforsu tomak atu hakat liu”, tenik.
Kona-ba diálogu atu ultrapasa impase polítika, Taur hatán kinta kada semana enkontru ho Prezidente-Repúblika hodi haree no fiar katak sei hetan solusaun, maibé importante maka hotu-hotu pasénsia hodi hein.
Jornalista: Xisto Freitas
Editora: Rita Almeida
