Nai Ulun Sira Mak Rezolve Impase Polítika

0
150
Komandante Jerál Polísia Nasionál Timor-Leste (PNTL), Komisáriu Júlio da Costa Hornay. Foto Mídia PR

DILI, (TATOLI) – Komandante Jerál Polísia Nasionál Timor-Leste (PNTL), Komisáriu Júlio da Costa Hornay, hateten líder istóriku sira sei atinji solusaun ba problema estabilidade no pás iha rai laran, tanba ne’e entrega impase polítika ba sira rezolve.

“Ita hotu tenke fiar katak ita nia líder istóriku sira sei atinje solusaun ida ba estabilidade no pás. Sira harii nasaun, hadomi nasaun, hadomi povu, ne’e duni sira sei hetan solusaun ba problema”, Hornay ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, sesta ne’e.

Hornay dehan bainhira nai ulun sira krítika malu, povu iha kraik labele teberetek resin, tanba ida ne’e sei la manán buat ida.

“Husu ba povu atu hakmatek. Hala’o de’it ita-boot sira nia atividade lor-loron nian hodi sustenta moris. Eskola oan karik, konsentra de’it ba eskola. Sira ne’ebé emprezáriu, konsentra de’it ba imi nia serbisu. Ita mete polítika ita manán saida”, Komisáriu ne’e fó hanoin.

Ulun boot PNTL ne’e haktuir situasaun jerál iha rai laran hakmatek hela, tanba povu hatudu ona maturidade polítika, só problema baibain hanesan violasaun doméstika, joven sira baku malu tanba lanu maka akontese, maibé PNTL halo atuasaun ona nomós asidente no insidente sira maka akontese.

Júlio tenik forsa seguransa no defeza kontinua garante estabilidade no pás atu asegura estabilidade nasionál.

Aleinde ne’e, nia tenik tan oras ne’e PNTL enfrenta difikuldade kona-ba mina (kombustível) no orsamentu manutensaun ba transporte no sujere ba Governu atu tau-matan ba kestaun refere, tanba ne’e urjente atu apoiu ba serbisu operasionál iha terrenu.

Ba asuntu ida ne’e Hornay dehan Xefe Estadu hato’o ona ba Primeiru-Ministru atu rezolve.

Jornalista: Xisto Freitas

Editora: Rita Almeida

HUSIK IDA HATÁN