MSSI Sei Responde Rekomendasaun CAVR no CVA

0
110
Ministra Armanda Berta dos Santos ofisialmente loke workshop iha sentru Nasionál Chega ho tema “Hasae Koñesimentu Kona-ba Servisu Apoiu PSIKO-Sosial iha Timor-Leste’’. Foto: Gabinete Media MSSI

DILI, (TATOLI) – Ministériu Solidariedade Sosiál no Inkluzaun (MSSI) sei dezenvolve polítika no programa hodi hatan ba rekomendasaun Komisaun Amizade Lialoos no Rekonsiliasaun (CAVR-sigla portugés) no Komisaun Lialoos no Amizade (CVA-sigla portugés) kona-ba solidaridade ho sobrevivente ne’ebé vulnerável iha área psiko-sosiál, labarik lakon, fundu solidariedade no seluk tan ne’ebé relasiona ho servisu sentru nian, hanesan kna’ar importante.

“Asaun área hirak ne’e sei kontribui ba Timor-Leste nia Planu estratéjiku nasionál no Objetivu ba Dezenvolvimentu Sustentável no sei hala’o kolaborasaun ho governu, sosiedade sivil no parte interesada seluk iha munisípiu hotu”, dehan ministra Armanda Berta dos Santos iha Sentru Nasionál Chega, ohin.

Liuhosi informasaun ne’ebé TATOLI asesu iha gabinete mídia MSSI haktuir ministériu toma responsabilidade importante hodi asegura no proteje ema vulnerável sira, hanesan hatur iha konstituisaun RDTL artigu 56 no iha Lei Kontra Violénsia Doméstika.

Berta haktuir governu kontinua mantein no dezenvolve programa hodi apoiu instituisaun sira hodi kanaliza nafatin apoiu liu husi sentru Chega.

Ministra mós kontinua fó korajen relasiona ho servisu sosiál no sei dezenvolve nota entedementu hodi oinsá garante servisu iha futuru.

Alende ne’e, MSSI hakarak servisu hamutuk ho sentru Chega!, grupu traballu no instituisaun relevante hodi ajuda labarik lakon husi okupasaun Indonézia.

Biban ne’e Armanda loke workshop iha sentru Nasionál Chega ho tema “Hasae Koñesimentu Kona-ba Servisu Apoiu PSIKO-Sosial iha Timor-Leste’’.

Hanesan reprezenta governu agradese ba servisu lubuk bo’ot ne’ebé hala’o ona husi CAVR no CNC, maske tuir nia governu seidauk hala’o programa espesífiku ba sobrevivente ba konflitu pasadu, maibé governu tau nafatin atensaun liuhusi Planu Estrategiku Nasional ba oin, Dezenvolve Planu asaun anuál hodi fornese apoiu ba instituisaun balun hodi fó atensaun ba promosaun no kbiit feto vítima husi pasadu no feto vulnerável sira.

Jornalista: Rafy Belo

Editora: Rita Almeida

HUSIK IDA HATÁN