MSSI Husu Funsionáriu Tenke Dixiplina iha Servisu Fatin

0
123
Isar Bandeira. Foto: MSSI

DILI (TATOLI)-Governu Konstitusionál da-walu, lideradu husi primeiru-ministru, Taur Matan Ruak, ohin, ofisiálmente hahú isar bandeira nasionál dahuluk, iha governasaun ida ne’e. Nune’e ministériu hothotu realiza atividade ida ne’e, inklui Ministériu Solidariedade Sosiál no Inkluzaun (MSSI).

Ministra Solidariedade Sosiál no Inkluzaun, Armanda Berta dos Santos, apela ba funsionáriu sira hotu, iha isár bandeira, ne’ebé hala’o iha edifísiu MSSI, Caicoli, Díli, ohin, katak tenke disiplina iha servisu fatin tuir lei funsaun públika mak hanesan, labele mai tarde, labele fila sedu, ida ne’e tuir lei la loos ona.

“Ita tenke respeita insituisaun estadu, fatin ida-ne’e, sagradu, ita atu halo servisu ba povu liu husi aréa sosiál, ne’e katak, MSSI la’ós fatin atu halo polítika partidária nian, instituisaun ida-ne’e nian na’in mak povu. Atu termina nu’udar ministra mai ho konsensus polítika ne’ebé loos, tanba ne’e mak husu ba funsionáriu hothotu atu apoiu másimu hodi dezempeña imi nian kna’ar ho di’ak, hahú husi nasionál to’o munisipál,” governante ne’e husu, ne’ebé Ajénsia TATOLI, asesu husi gabinete media MSSI, ohin.

Relasaun ho servisus MSSI nian, governante ne’e fó korajen ba hothotu katak, atendementu sosiál labele sees husi setór estratéjiku ne’ebé kontempla iha Planu Estratéjiku Dezenvolvimentu Nasionál. “Kondisaun ne’ebé ha’u temi durante ida-ne’e, loos duni, ita bo’ot sira hala’o ona no agora ita kontinua,” dehan ministra ne’e.

Ministra Solidariedade Sosiál no Inkluzaun, Armanda Berta dos Santos mós husu nafatin ba diresaun jerál no nasionál sira atu hametin liña ministériu nian, kooperasaun ho parseiru sira hotu, tantu nasionál no internasionál ne’ebé durante ida-ne’e, hala’o hela.

Tanba ne’e mak kondisaun no situasaun servisu em termos estruturál no funsionál, presiza hametin no hahí, koordenasaun, komunikasaun no sinkronizasaun entre nível vertikál no orizontál iha ministériu nia laran.

“Bainhira ha’u haree no lee rezultadu diagnóstiku nasionál ba fortalesementu Institusionál kona-ba relatóriu atividades auto-avaliasaun ba MSSI indika, iha problema no dezafius lubuk mak iha Ministériu ida-ne’e infrenta. Tanba ne’e mak ha’u husu ba diresoens jerais rua, inklui inspetór jerál atu haree didi’ak no hadi’ak liutan mak opsaun di’ak hodi reforsa kontrolu internál,” hateten ministra Armanda Berta.

“Diretores MSSI nasionál no munisipais atu garantia susesu MSSI, ba futuru, ha’u husu, atu atensaun másimu kualidade servisu ba asuntu jestaun finansa, ba asuntu administrasaun, seguransa sosiál, dezastre naturais inklui ho parseiru sira hotu ho loloos no momoos, tanba povu hein hela ita-nia atendementu di’ak iha aréa sosiál nian no iha momentu ida ne’e ha’u husu ba ita hotu servi ho onestidade, transparante no loialidade tuir orden no regra ne’ebé vigór,” nia hatutan.

Kona-ba loron dahuluk lidera isár bandeira, ministra Armanda Berta dos Santos agradese ba funsionáriu sira hotu nia partisipasaun no fiar katak funsionáriu sira-nia partisipasaun ida ne’e sei ativu nafatin tuir kalendáriu ne’ebé mensiona iha kada mensál.

Ministra ne’e akresenta tan katak nu’udar ministra, politikamente hetan fiar husi oitavu governu konstitusionál hodi lidera MSSI atu serbisu ba povu doben Timor-Leste liuhusi aréa sosiál ho loloos no momoos, tanba povu ne’ebé moris iha Nasionál no Munisipál sira hotu hein hela atendementu sosiál ne’ebé dignu.

Nune’e mós, ba prezensa ida-ne’e, nu’udar ministra husu ba funsionárius tomak husi Nasionál to’o Munisipál sira katak, servisu no servisu, tanba ita mak aparellu estadu, durante mandatu ida ne’e sei la aseita atu iha indikasaun ruma relasaun ho korupsaun, koluzaun no nepotizmu iha servisu nia laran.

Entretantu, iha primeira atividade isár bandeira ba MSS, iha governu da-walu ne’e, lidera husi ministra Armanda Berta dos Santos hamutuk ho Vise Ministra, akompañadu husi diretór jerál sira, inspetór jerál, diretór nasionál sira, xefe departamentu sira, xefe unidade sira, asesór nasionál  no internasionál sira espesialmente funsionáriu MSSI.

Jornalista: Rafy Belo

Editór : Manuel Pinto

HUSIK IDA HATÁN