Ministru Dionísio Sei Reprezenta PR Iha Simeira CPLP

0
188
Ministru Negósiu Estranjeiru no Kooperasaun, Dionísio Babo

DILI (TATOLI) – Ministru Negósiu Estranjeiru no Kooperasaun, Dionísio Babo informa nia sei reprezenta Prezidente Repúblika (PR), Francisco Guterres Lú Olo iha enkontru xefe estadu sira iha Cabo Verde, nu’udar enviadu estraordináriu tuir dekretu prezidensiál.

“Prezidente Repúblika halo dekretu prezidensiál ida ne’ebé liuhosi komunikasaun karta xefe kaza sivíl nian indika ministru negósiu estranjeiru atu sai enviadu estraordináriu ba reprezenta ita nia nasaun iha simeira komunidade país língua portugeza (CPLP) iha Cabo Verde”, tenik ba jornalista órgaun komunikasaun sira iha Palásiu Governu, ohin.

Hodi hatutan, simeira ne’ebé sei realiza iha loron 17 to’o 18, alende enkontru xefe estadu sira, iha mós enkontru ministru negósiu estranjeiru sira, tanba ne’e ajenda okupadu oi tuan.

“Ajenda sira ne’ebé prepara husi país Cabo-Verde mak hanesan, sei hola kargu xefia ba CPLP no sira iha ajenda lubuk ida ne’ebé iha relasaun ho língua, kultura nó mós kestaun sira ne’ebé iha relasaun ho elevasaun kualidade serbisu ba CPLP liu-liu ba tinan 5 ba oin”, akresenta.

Entretantu, simeira CPLP ne’e hanesan XII konferénsia ba xefe estadu no governu sira ne’ebé sei hala’o iha Vila de Santa Maria, Illa do Sal no sei marka tranzisaun prezidénsia komunidade luzófona Brazil ba Cabo Verde.

Realizasaun konferénsia xefes Estadu no Governu sira iha loron aniversáriu CPLP ne’ebé kumpre tinan 22 ezisténsia iha loron 17 Julhu ne’e. Enkuantu simeira ikus, antes ne’e realiza iha Brazil iha loron 31 to’o 1 Novembru 2016.

CPLP kompostu husi Angola, Brazil, Cabo Verde, Guiné-Bissau, Guiné Equatorial, Moçambique, Portugal, São Tomé e Príncipe no Timor-Leste. 

Jornalista: Julia Chatarina

Editór : Manuel Pinto

HUSIK IDA HATÁN