MD Fó Prioridade Moderniza Forsa Armada

0
321
Ministru Defeza nian, Filomeno Paixão ko’alia ho Prezidente Repúblika, Francisco Guterres Lú olo ho Primeiru Ministru, Taur Matan Ruak, hafoin simu pose iha Palásiu Prezidensiál Bairru-Pité, Ohin

DILI (TATOLI)—Ministru Defeza (MD), Filomeno da Paixão de Jesus, hateten nia sei konsolida profesionalizasaun Forsa Armada, liu-liu oinsá atu bele moderniza Forsa Armada iha Timor-Leste.

“Importante maka ita kaer nafatin ba iha Konstituisaun, kaer ba Planu Estratéjiku 2011-2030, kaer ba iha Konseitu Estratéjiku Defeza no Seguransa ne’ebé VI Governu aprova ona iha dezembru 2016. Liuhusi ida ne’e maka bele dezenvolve fali Forsa Armada ne’e ba oin,” Filomeno hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin simu pose nu’udar Ministru Defeza.

Nia esplika iha preokupasaun hosi nível kraik katak Forsa 20-20 ne’e dezatualizadu ona entaun hanoin katak halo oinsá maka atu halo revizaun ba Konseitu Planu Estratéjiku 20-20 ne’ebé halo iha tinan 2006.

“Atu halo revizaun ba Konseitu Planu Estratéjiku 20-20 ne’e maka ita atu halo estratéjia militár foun. Estratéjia Militár foun maka ita tenke define ameasa ba iha Timor-Leste saida no risku saida. Kuandu ita konsensu ona iha ameasa no risku, iha ne’e ita hanoin ona halo oinsá ita define misaun ba iha Forsa Defeza,” Filomeno esklarese.

Atu halo misaun ba Forsa Defeza, nia dehan, presiza organiza Sistema Forsas, katak, tenke iha komponente Terrestre, Naval, Aerea, Forsa Espesiál no sel-seluk tan, hafoin ne’e tenke forma ema, identifika infraestrutura, iha treinu no iha doutrina.

“Ida ne’e maka todan liu. Portantu, iha ne’e presiza konsensu. Husu forsa (poderes) hotu ne’ebé maka iha Estadu ida ne’e nia laran presiza iha hanoin ida de’it tanba forsa ne’e bainhira ita atu harii presiza osan. Kuandu iha osan, presiza konsensu,” eis Brigadeiru Jenerál ne’e informa.

Jornalista: Xisto Freitas

Editór : Manuel Pinto

 

HUSIK IDA HATÁN