Labele Eksklui Defisiente Sira

0
99
Ilustrasaun

DILI, (TATOLI) – Jestora programa Fundasaun Media Development Center (FMDC), Teodósia dos Reis, hateten oportunidade ba ema normál no defisiénsia tenke hanesan no labele eksklui sira iha sosiedade, tanba ita iha direitu hanesan no konsagra mós programa Objetivu Dezenvolvimentu Sustentável (ODS).

ODS iha pontu 10 mak akresenta nasaun sira presiza halo redusaun ba dezigualidade. Vizaun estratéjika husi objetivu mak la’ós konstroi de’it kona-ba objetivu eradikasaun ki’ak iha nia dimensaun sira hotu, maibé redusaun ba dezigualidade sósiu-ekonómika no kombate diskriminasaun ih tipu oioin.

“Mai ha’u, ita tenke fó oportunidade ne’ebé hanesan ba defisiénsia sira, tanba iha ODS mós dehan no one leaves behind (Labele husik hela ema ida iha kotuk), tenke iha oportunidae hanesan”, akresenta jestora Teodósia dos Reis, bainhira entrevista ho TATOLI iha nia kna’ar fatin Bairru Pité, ohin.

Nia reforsa direitu ba ema nian, inklui defisiénsia sira konsagra ona mós iha Deklarasaun Universál Direitu Umanu, nune’e mós konstituisaun Repúblika Demokrátika Timor-Leste (RDTL).

Artigu ne’ebé ko’alia kona-ba defisiénsia iha konstituisaun mak artigu 21 (sidadaun ne’ebé iha defisiénsia) katak; 1) sidadaun ne’ebé iha defisiénsia fíziku eh mentál iha direitu nomós obrigasaun hanesan sidadaun sira seluk, maibé sira sei la hala’o kna’ar hirak ne’ebé sira labele hala’o tanba de’it sira-nia defisiénsia. 2) Estadu, bainhira bele, promove protesaun ba sidadaun sira-ne’ebé iha defisiénsia, tuir lei haruka.

Tanba ne’e atu garante deklarasaun no konstituisaun ne’e, parte ida atu ajuda defisiente sira mak direitu ba asesibilidade.

“Dalabarak iha gedung boot sira ne’e laduun iha asesu; entaun dalaruma iha treinamentu ruma iha eskada leten, sira (defisiente) atu sa’e ba leten susar tebes. Iha parte edukasaun ita hakarak separa; loloos labele. Se ita separa ne’e, ita sente sira inferiór ona iha ita-nia sorin, loloos ita inklui mós sira iha laran. Importante maneira fasilitasaun ba sira”, tenik Teodósia dos Reis.

Tanba ne’e, dala ida tan, jestora FMDC insiste katak asesibilidade defisiénsia sira nian ba oportunidade mós presiza hanesan ho ema ho kondisaun normál sira, tanba mezmu fizikamente sira iha defisiénsia, maibé iha koñesimentu no abilidade ne’ebé hanesan mós ho ema normál sira no dalaruma liu.

Jornalista: Rafy Belo

Editora: Rita Almeida

HUSIK IDA HATÁN