KFP Relata Servisu 2017 Ba PM

0
125
Prezidente KFP, Faustino Cardoso, entrega relatóriu KFP ba Primeiru-Ministru, Taur Matan Ruak, iha Palásiu Governu, Imajen dokumentasaun GPM

DILI, (TATOLI) – Komisaun Funsaun Públika (KFP) ohin relata servisu komisaun nian durante 2017 ba Primeiru-Ministru, Taur Matan Ruak, iha Palásiu Governu.

Durante hasoru malu Xefe Ezekutivu fó ninia apoiu ba dezenvolvimentu servisu KFP atu  asegura funsaun públika ida imparsiál, profesionál hodi fó  atendementu públiku ida kualidade ba sidadaun hotu.

“Primeiru-Ministru promete sei halo enkontru ho komisaun iha loron seluk hodi ko’alia problema ne’ebé komisaun hasoru, depois aprejentasaun programa no orsamentu ba parlamentuʺ, dehan Komisáriu KFP, José Telo Soares Cristovão, ba jornalista sira hafoin relata servisu komisaun nia durante 2017 ba Xefe Governu iha Palásiu Governu, ohin.

Enkontru ne’e akompaña mós hosi Prezidente KFP, Faustino Cardoso, ho ekipa.

Relatoriu KFP 2017 ne’e deskreve kona-ba servisu KFP, liliu prioridade iha ámbitu reforma funsaun públika no atividade ne’ebé ligadu ho jestaun pesoál iha setór públiku.

Polítika reforma funsaun públika ne’e ho objetivu atu hadi’a servisu ida efikaz, inovativa, imparsiál ho responsabilidade hodi hasa’e prestasaun servisu ba públiku.

KFP harii iha jullu 2009 ho objetivu asegura funsaun públika ida imparsiál, integra no profisionál hodi fó servisu ba públiku ida kualidade ba sidadaun hotu.

Tuir diploma legál, KFP nu’udar orgaun independente ne’ebé oras ne’e tutela ba Primeiru-Ministru no lei atribui kompeténsia atu hato’o ba governu pareser tékniku sira ligadu ho jestaun rekursu umanu iha setór públiku.

Jornalista: Agapito dos Santos

Editora: Rita Almeida

HUSIK IDA HATÁN