JSMP Rekomenda PN Fó Prioridade Másimu Ba Lei Anti Korupsaun

0
114
Diretór Exekutivu JSMP, José de Oliveira Sampaio. Foto Facebook José de Oliveira Sampaio.

DILI (TATOLI) – Programa Monitorizasaun Sistema Judisiál (JSMP-Judicial System Monitoring Program) rekomenda Parlamentu nasionál (PN) Fó prioridade másimu ba ezbosu Projetu Lei Anti Korrupsaun ne’ebé aprezenta husi bankada parlamentár FRETILIN no PD ba meza (PN) foin lais ne’e.

JSMP rekomenda ba meza Parlamentu Nasionál atu fó prioridade másimu ba ezbosu Lei Anti Korrupsaun hodi bele admite no tau iha planu lejizlasaun Parlamentu Nasionál nian iha sesaun dahuluk, V lejizlativa hodi diskute no aprova”, refere nota komunikadu husi JSMP.

Diretór Ezekutivu JSMP, Luis de Oliveira Sampaio apresia ho inisiativa bankada parlamentár FRETILIN no PD ne’ebé aprezenta ona Projetu Lei Anti Korrupsaun ba meza PN.

“JSMP apresia tebes ho inisiativa bankada rua ne’e, tanba tau duni importánsia ba preokupasaun públiku nian durante ne’e hodi aselera prosesu diskusaun ba ezbosu Lei Anti Korrupsaun ne’ebé kaduka tiha ona iha lejizlatura rua liubá kotuk”, dehan Diretór Ezekutivu JSMP, Luis de Oliveira Sampaio liuhosi nota komunikadu ida.

Tuir nia, inisiativa ne’e nu’udar jestu polítiku ne’ebé hatudu katak partidu FRETILIN no PD kumpre sira-nia kompromisu polítika iha kampaña eleitorál iha Eleisaun Antesipada 2018 nian, atu luta kontra korrupsaun liuhosi haforsa tan kuadru legál sira hanesan Lei Anti Korrupsaun.

“Ida ne’e mós hatudu katak bankada rua ne’e iha kapasidade atu kaptura no interpreta espetativa no vontade populár maioria povu nian katak Lei Anti Korrupsaun importante atu prevene no kombate atividade korrupsaun iha Timor-Leste, hanesan promove boa-governasaun no asegura “bem estar” ba sidadaun hotu-hotu”, tenik.

Nune’e, JSMP husu ba partidu polítiku sira hotu iha PN, liuliu koligasaun partidária Aliansa Mudansa ba Progresu (AMP) ne’ebé kompostu hosi partidu CNRT, PLP no KHUNTO no koligasaun partidária seluk atu apoiu inisiativa ne’e no lori Projetu Lei Anti Korrupsaun atu ba diskute no aprova iha tinan dahuluk, V lejizlatura nian.

Antes ne’e, JSMP  mós husu ona ba deputadu eleitu sira iha V lejizlatura, atu aprova Projetu Lei Anti Korrupsaun imediatamente sein adiamentu ne’ebé la nesesáriu liuhosi dezenvolve programa lejizlativu nasionál no hatuur Projetu Lei Anti Korrupsaun hanesan prioridade ida ne’ebé aas iu projetu lei sira seluk.

Entretantu, projetu lei ne’ebé aprezenta husi bankada opozisaun ne’e, kompostu husi kapítulu haat mak hanesan: kapítulu I prevee konaba dispozisaun penál, Kapítulu II prevee kona ba dispozisaun prosesuál penál, Kapítulu III prevee kona ba partisipasaun públiku no kapítulu IV prevee kona ba dispozisaun finál.

Kapítulu I, konstitui hosi provizaun sira ne’ebé define kona ba aktu korrupsaun ne’ebé regula iha artigu sira iha kódigu penál no aktu krime korrupsaun sira ne’ebé la regula iha kódigu penál mak hanesan faktu sira ne’ebé halo ne’e fora husi territóriu nasionál, responsabilidade kriminál husi ema koletiva, pena aplikável  ho nia atenuasaun espesiál ba penál sira inklui krime enrikesamentu ilísitiu no fraude iha konstrusaun.

Kapítulu II, konstitui hosi provizaun sira ne’ebé define konaba karaterístika prosesu, devér kolaborasaun, investigasaun, reprezentasaun iha ema koletiva ho nia prosesu, denúnsia anónima, buska no revista, aprensaun, asesu espesiál ba komunikasaun, konjelamentu no konfisku sasán sira ne’ebé la loos, segredu bankáriu, defeza direitu terseira parte ho boa fé, protesaun testemuña nian, detensaun fora husi flagrante delitu, asaun kompensasaun no arguidu nia mate no asaun sivíl.

Nune’e mós kapítulu III, define konaba públiku nia partisipasaun iha kombate korrupsaun no rekoñesementu Estadu nian ba ema sira ne’ebé kontribui ba prevene ho halakon korrupsaun.

Ikus liu iha kapítulu IV, define konaba oinsá atu Governu bele kria fali regulamentu própriu ida ne’ebé prevee konaba norma no prosedimentu partisipasaun públiku nian iha prevensaun no kombate korrupsaun bainhira lei ne’e tama iha vigor.

Antes ne’e liuhosi konferénsia imprensa foin lais ne’e, Vise Xefe bankada FRETILI, Francisco Miranda Branco hateten partidu FRETILIN no PD iha ona kontratu sosiál ho eleitór sira konaba Lei Anti Korrupsaun.

“Ami nia kampaña husi partidu rua nian atu halo Lei Anti Korrupsaun. Ida ne’e mós la’os foin mak hahú, maibé inisia ona iha III lejislatura iha tinan 2014, ne’ebé ami deputadu lubun ida hatama ona projetu lei ba meza parlamentár maibé la diskute to’o kaduka tia”, nia haktuir.

Deputadu bankada PD, Adriano do Nascimento reforsa FRETILIN no PD subskreve ezbosu projetu lei ne’e tanba konsidera importante atu fasilita ka haforsa liu tan servisu Komisaun Anti Korrupsaun (KAK), hodi hala’o servisu ho diak. Tanba ne’e, PN presiza fasilita lei atu sira bele hala’o knar ho profisionál.

“Ami espera katak projetu lei ne’ebé mai husi partidu FRETILIN no PD, lideransa meza prezidénsia parlamentu bele fó importánsia. Depois ne’e sei iha prosesu lubuk ida mak prezidente elabora ka nota téknika informa ba lider  bankada sira hafoin hatún ba komisaun , depois komisaun elabora pareser jurídika no mai fali iha plenária”, nia esplika.

Jornalista: Julia Chatarina

Editór : Manuel Pinto

HUSIK IDA HATÁN