Horta: Governu Tenke iha Integridade

0
394
Eis Prezidente-Repúblika (PR), José Ramos Horta

DILI (TATOLI)—Eis Prezidente-Repúblika, José Ramos Horta, hateten Prezidente-Repúblika iha obrigasaun konstitusionál atu haree sé maka tama Governu tenke iha integridade nune’e fó kredibilidade ba Governu.

Atu rezolve kestaun ida ne’e, tuir nia, liuhusi diálogu entre Prezidente-Repúblika ho Primeiru-Ministru no nia fiar katak sei hetan solusaun tanba ne’e la’ós problema ida ne’ebé komplikadu teb-tebes.

“Rai ne’e ki’ik no kle’ur ona ita laiha Governu ida ho estabilidade, ne’e duni, ha’u hein katak Prezidente Repúblika nu’udar Xefe Estadu nomós Primeiru-Ministru bele halo diálogu para bele rezulta Governu ida ne’ebé forte hodi aguenta to’o tinan lima,” Horta hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, relasiona ho polémika kona-ba Prezidente Repúblika husu atu Primeiru-Ministru revé hikas fali kandidatu membru Governu balun ne’ebé antes ne’e infrenta justisa iha Tribunál tanba deskonfia involve iha korupsaun.

Tuir nia katak bainhira situasaun ne’e kontinua akontese (laiha etsabilidade governativa), investór sira ta’uk mai halo investimentu iha Timor.

Horta informa estrutura Governu ne’ebé boot sei defikulta Primeiru-Ministru, Taur Matan Ruak, atu halo koordenasaun no jestaun, no ida ne’e ezersísiu ida atu dezafia Primeiru-Ministru nia matenek.

Jornalista: Xisto Freitas

Editór : Manuel Pinto

HUSIK IDA HATÁN