Governu Sei Estabele Banku Foun Hodi Kapitaliza Setór Privadu

0
209
Primeiru Ministru, Taur Matan Ruak aprezenta programa VIII Governu iha Parlamentu Nasionál. Foto Antonio Goncalves

DILI, (TATOLI) – Primeiru-Ministru (PM), Taur Matan Ruak, hatete Governu da-ualu sei estabele Banku Dezenvolvimentu Timor-Leste (BDTL)/Banku Investimentu Timor-Leste (BITL) hodi fasilita setór privadu iha área dezenvolvimentu.

“idea atu harii banku dezenvolvimentu, kapitaliza setór privadu iha área dezenvolvimentu. Maibé ne’e kestaun ida ne’ebé presiza diskute maka’as ho parte téknika banku para haree nia viabilidade no premissaun”, tenik bainhira hatan ba perguntas husi deputadu sira kona-ba estabelesementu banku, iha biban aprezentasaun programa Governu iha plenária, foin lais ne’e.

Xefe Governu hatutan atu harii banku ne’e presiza autorizasaun husi Parlamentu Nasionál (PN), tanba sei investe osan barak iha ne’eba.

“Tanba sita fundu, permisaun husi desizaun Parlamentu Nasionál, ita la harii banku ida atu tau osan $10, $20 (osan ituan), maibé atu tau osan barak. Tanba ne’e naturalmentu governu tenke mai husu autorizasaun”, dehan tan.

Hodi haktuir iha esperiénsia, krédit sira ne’ebé mak jurus boot la ajuda setór privadu iha nia esforsu atu fó kontribuisaun iha prosesu dezenvolvimentu ekonómiku.

“Ita tenke halo baratu tan jurus, ida ne’e desizaun ida ne’ebé la-fásil, maibé ita laiha alternativa, ita mantein hanesan ou simu risku, maibé ita mós fó kondisaun ba setór privadu”, katak.

Entretantu, iha programa Governu haktuir dezenvolvimentu ba setór privadu la la’o iha tempu naruk, tanba limita projetu Estadu no laiha asesu kréditu no finansiamentu ba prazu naruk no jurus asessível, enkuantu empreza sira presiza kréditu atu investe.

Maioria pedidu kréditu iha Timor-Leste ba reabilitasaun otel sira, fasilita empreza konstrusaun sivíl iha akizasaun ba ekipamentu no ba konstrusaun abitasaun no eskritóriu.

Apezar banku komersiál hahú aumentu likidez no sistema bankáriu, kréditu ba setór privadu kontinia menus pursento 14 husi totál ne’ebé ativu. Banku sira ne’ebé existe ona so fó kréditu ba organizasaun internasionál sira, empreza lokál sira no setór sira ne’ebé depende ba kontratu governu no investimentu públiku.

Tanba ne’e governu iha hanoin atu estabelese BDTL/BITL, ho objetivu fasilita asesu ba finansiamentu tempu naruk, ho taxa jurus ne’ebé asessível.

Banku ne’e sei fó oportunidade ba empreza timoroan sira hodi sustenta-án no harii empregu barak, kontrui infraestrutura no kontribui ba diversifikasaun ekonómika. Banku ne’e sei foka espesialmente atu atende asesu kréditu iha área sira ne’ebé estratéjika nasaun nian, ne’ebé iha relasaun ho kresimentu setór privadu no dezenvolvimentu merkadu finanseiru.

Estadu sei sai nain ba banku ne’e, no sei kontribui kapitál timoroan ba banku ne’e ho investimentu ne’ebé klaru no regorozu, ho operasaun administrativa no komersiál independente no padraun boa governasaun ne’ebé aas.

Jornalista: Julia Chatarina

Editora: Rita Almeida

HUSIK IDA HATÁN