Governu Planu Atu Transforma Kapitál Dili Sai Sentru Aprendizajen

0
282
Primeiru-Ministru, Taur Matan Ruak. Foto António Goncalves

DILI (TATOLI) – Primeiru-Ministru (PM), Taur Matan Ruak hateten, VIII Governu Konstitusionál ne’ebé nia lidera sei kontinua investe iha liña dijitál sira hodi transforma nasaun no kapitál Dili.

“Kontinua investe iha liña dijitál sira, iha teknolojia komunikasaun sira, iha fibra óptika atu hetan ba asesu internet, hodi transforma ita nia Nasaun no ita nia Kapitál Díli sai Sentru Aprendizajen no Teknolojia Foun ida ne’ebé loloos”, tenik iha plenária, ohin.

Tuir Xefe Governu, ita konsege halo progresu boot barak iha demokratizasaun asesu ba servisu movel telefone nian, ne’ebé kobre hamutuk 81% iha tinan 2015 no oras ne’e kobertura ne’e sa’e liután ba 96%  husi área hirak ne’ebé populasaun sira hela.

“Asesu ba servisu dadus 3G no 4G nian mós aumenta nafatin to’o oras ne’e, ne’ebé daudaun ne’e disponivel iha sede munisípiu no rejiaun nian hotu-hotu”, nia aprezenta.

Hodi hatutan sei iha serbisu ne’ebé halo atu garante kombate hasoru info eskluzaun iha área izolada no rurál sira.

“Iha tempu badak ita sei kontinua habelar oferta servisu administrasaun públiku nian sira liuhusi ligasaun iha fibra óptika ne’ebé ho destaka no prioridade ba Edukasaun no Saúde, ne’ebé utiliza rede tranzmisaun sira EDTL nian”,  Primeiru Ministru tenik.

Aleinde ida ne’e, tuir Primeiru Ministru, governu sei kontinua aposta iha teknolojia informasaun no komunikasaun sira, atu alkansa objetivu tranzversál oin-oin husi programa dezenvolvimentu nian.

“Iha implementasaun Governasaun Eletrónika (egoverment) ne’ebé simples, besik, lais, efikás, efisiente no tanba meiu ida ne’e ladún burokrátiku, nune’e bele promove ekonomia dijitál ida ho servisu foun banda larga, televizaun dijitál terrestre no produtu sira ne’ebé disponibilizadu online, hodi promove negósiu sira setór privadu no esportadór sira no atu garante estrutura ida ne’ebé adekuada kona ba seguransa sibernétika.

Jornalista: Julia Chatarina

Editór : Manuel Pinto

HUSIK IDA HATÁN