Governu Kompromete Foku Ba Setór Kooperativa

0
72
Sekretáriu Estadu Kooperativa, Arsénio Pereira da Silva, bainhira vizita stand iha feira hodi komemora loron kooperativa. Foto/Facebook SEDK.

DILI, (TATOLI) – Sekretáriu Estadu Kooperativa, Arsénio Pereira da Silva, hatete Governu iha seriedade atu foku liu ba setór kooperativa nu’udar ekonomia povu.

“Hanesan iha diskursu husi Primeru-Ministru, Taur Matan Ruak, bainhira toma pose Oitavu Governu nian énfaze liuliu ba hametin ekonomia husi baze no moris di’ak povu nian, entermu iha nutrisaun di’ak, iha abitasaun di’ak no iha kriasaun servisu hodi redús dezempregu iha Timor-Leste”, Arsénio afirma iha abertura feira ne’ebé organiza husi Federasaun Hanai Malu hodi selebra loron kooperativa ne’ebé sei monu iha jullu ne’e, iha Bairru-Pité, domingu.

Hanesan Sekretáriu Estadu kompromete no kumpri atu serví rai no povu Timor-Leste, liuhusi polítika no implementasaun programa Governu nian iha setór kooperativa tuir prioridade husi tinan primeru to’o iha mandatu ikus.

“Atu atinje prioridade programa sira ne’e hotu, ha’u fiar katak la’ós ema ida ka rua de’it nia kontribuisaun, maibé presiza ema hotu nia kontribuisaun tuir ida-idak nia abilidade no kreatividade atu kontribui hodi dezenvolve setór kooperativa hodi sai ajente no pilár ekonomia iha rai doben Timor-Leste”.

Tanba ne’e atu hatene direitamente dezenvolvimentu kooperativa nian Sekretáriu Estadu sei vizita kooperativa ida-idak no sei halo planu asaun hamutuk ho membru liuliu kooperativa produsaun sira, tanba Governu anteriór iha ona diagnóstiku ida hanesan baze ida atu hatene nia frakeza no nia forsa iha progresu setór ida ne’e iha Timor-Leste.

“Ho ida ne’e fó giaun mai ha’u atu ba diretamente iha rurál hodi hatene di’ak liu kooperativa nia ezisténsia sira ne’e hotu nia parte fraku iha ne’ebé? Parte forsa iha ne’ebé? Atu nune Governu bele hatene no halo polítika, programa no planu asaun hodi hadi’a ida fraku no haforsa tan ida ne’ebé seidauk forte”.

Bazea ba konstituisaun no dekretu lei kooperativa fó dalan ba ezisténsia kooperativa iha Timor-Leste. Tuir dadus ne’ebé iha númeru kooperativu hamutuk 191 ne’ebé rejistadu, maibe husi numeru ida ne’e iha de’it 40 mak la’o di’ak no sufisiente iha tipu kooperativu sira ne’e mak hanesan finanseiru iha 33, kooperativa multi sektotál neen, no kooperativa agrikultura ida de’it.

“Ha’u fiar katak iha kamponezes lubun balun ne’ebé seidauk rejistu hanesan kooperativa, maibé hanesan grupu produtór ne’ebé atu hola parte iha atividade ekonómika sei barak iha área rurál no remota ne’ebé sei hein hela prezensa Governu, nia asisténsia, hodi fasilita, haforsa, organiza no hakbiit liután ezisténsia sira-nian nu’udar kriadór kampu serbisu ba ida-idak nia-an liuhusi agrupamentu forsa serbisu iha setór produtivu ne’ebé bele hasa’e kreximentu ekonomia uma-kain”.

Jornalista: Maria Auxiliadora

Editora: Rita Almeida

HUSIK IDA HATÁN