Governu EUA inklui Timor-Leste iha  YSEALI

0
111
Foto Espesial

DILI – Iha ninia diskursu durante Embaixada EUA nia selebrasaun ba Loron Independénsia Amérika nian iha loron 29 Jullu 2018, Adjuntu Asistente Ministru Negosiu Estranjeiru Walter Douglas anunsia ofisialmente inkluzaun Timor-Leste nian iha Young Southeast Asian Leaders Initiative (YSEALI).

Programa importante governu EUA nian hodi promove dezemvolvimentu lideransa no interasaun entre joven sira iha Sudeste Aziátiku.

YSEALI ne’ebé Lansa iha 2013, buka atu harii kapasidade lideransa joven sira nian iha rejiaun ne’e, hametin relasaun entre Estadus Unidus no Sudeste Aziátiku no apoia komunidade ASEAN.

YSEALI oferese oportunidade ba lider joven sira ho tinan 18-35 atu partisipa iha programa oi-oin inklui programa interkámbiu edukasionál no professional iha Estadus Unidus, semináriu rejionál no asesu ba fundu ba projetu komunitária nian.

YSEALI foka liu ba tópiku krítiku sira ne’ebé identifika husi joven sira iha rejiaun ne’e: Envolvimentu síviku, dezenvolvimentu sustentável, edukasaun no kreximentu ekonómiku. To’o oras ne’e, joven liu 125,000 iha Sudeste Aziátiku mak sai ona membru YSEALI no alumni barak mak asume ona papél lideransa iha sira nia governu, setór privadu, media, akademia no ONG sira.

Alem, partisipa iha tópiku interesante sira ne’e, Timor-Leste hanesan mós nasaun Sudeste Aziátiku sira seluk ne’ebé nia populasaun ho estimasaun porsentu 70 mak maioria joven ho idade menus husi 35.

“Ida ne’e duni mak imposivel atu ko’alia konaba dezenvolvimentu nasaun sira nian ka objetivu diplomasia EUA nian sem inklui Timor-Leste nia joven sira iha programa ida ne’e,” Douglas dehan, no konsidera Timor-Leste mós nu’udar nasaun foun iha rejiaun Indo-Pasífiku ne’ebé hetan nia independénsia total iha 2002.

Embaixada EUA iha Dili sei koordena ho Misaun EUA nian ba ASEAN iha Jakarta no Biro Asuntu Ázia Leste no Pasífiku iha Ministériu Negósiu Estranjeiru EUA nian hodi implementa YSEALI iha Timor-Leste.

“Ami haksolok tebes konaba inkluzaun Timor-Leste nian ba YSEALI, tanba sei oferese oportunidade barak ba joven Timor oan hodi halo interasaun ho joven sira iha Estadus Unidus no ASEAN,” Embaixadora EUA Kathleen M Fitzpatrick reforsa tan.

Detallu konaba YSEALI iha Timor-Leste, inklui oportunidade ba inskrisaun no programa sei fó sai iha lansamentu ofisial ne’ebé planeadu atu hala’o iha tinan ida ne’e.

(Komunikadu)

HUSIK IDA HATÁN