Governu Aprova Kooperasaun TL no MCC

0
205
Primeiru-Ministru, Taur Matan Ruak prezide reuniaun iha Konsellu Ministru.

DILI (TATOLI) – Governu liuhosi reuniaun Konsellu Ministru (KM) aprova ona kooperasaun entre governu Timor-Leste (TL) no Millenium Challenge Coorporation (MCC) hodi hahú halo ona serbisu atu prodúz millenium compact nian ba Timor-Leste nia dezenvolvimentu.

“Ida mak Millenium Challenge Coorporation hanesan asuntu ida ne’ebé permite Timor-Leste atu engaja, atu hahú halo ona serbisu atu prodúz millenium compact nian ba Timor-Leste nia dezenvolvimentu, aprovasaun iha Konsellu Ministru ohin hetan ona.”, tenik Ministru Estadu Prezidénsia Konsellu Ministru, Agio Pereira informa ba jornalista sira hafoin reuniaun ezekutivu iha Palásiu Governu, ohin.

Nia konta, aprezenta husi Ministru Reforma Lejislativa no Asuntus Parlamentares, Fidelis Leite Magalhães, tanba nia hanesan mós governu nia pontu kontaktu iha Prezidénsia Konsellu Ministrus.

Tuir governante ne’e, aban sei asina akordu entre governu Timor-Leste no MCC hodi hahú serbisu ona.

“Aban atu asina ona akordu ne’e ho MCC, hodi hahú serbisu atu hari ekipa ida hodi halo akompañamentu ba prosesu ne’ebé diagnóstiku ho saida mak ita nia rai iha, hodi bele serbisu hamutuk nu’udar parseiru atu tulun no hetan solusaun”, Agio esplika.

Entretantu biban ida ne’e, KM mós aprova Tetu orsamentál ba Orsamentu Jerál Estadu (OJE) hodi aselera proposta ne’e ba parlamentu Nasionál (PN).

“Tetu orsamentál ba Orsamentu Jerál Estadu tinan ida ne’e ninia, tanba tinan ida ne’e ita seidauk iha orsamentu 2018, ne’ebé Konsellu Ministru aprova tetu ne’e, no fó instrusaun ba Ministériu Finansas no tékniku sira hodi sira hahú serbisu hodi aselera proposta ba Parlamentu Nasionál. Tanba besik ona Dezembru no ita nia orsamentu iha tinan ne’e sei iha duodecimo nia laran, tanba ne’e KM fó prioridade ba asuntu ne’e,” Agio hakotu lia.

 Jornalista: Julia Chatarina

Editór : Manuel Pinto

HUSIK IDA HATÁN