Governu Aprova Alterasaun Ezekusaun Rejime Duodesimál

0
431
Ministru Reforma Lejislativa no Asuntu Parlamentár, Fídelis Leite Magalhães. Foto António Goncalves

DILI, (TATOLI) – Governu Konstitusionál da-ualu liuhosi reuniaun Konsellu Ministru (KM) estraordinária aprova ona alterasaun daruak dekretu governu númeru 1/2018, 12 janeiru kona-ba ezekusaun rejime duodesimál, tanba Orsamentu Jerál Estadu (OJE) tinan 2018 ladauk iha.

“Ohin iha reuniaun estraordináriu Konsellu Ministru, ami rona aprezentasaun husi Ministériu Finansas kona-ba plafon orsamentu Estadu ba 2018. Ami mós aprova proposta alterasaun daruak ba dekretu númeru 1/2018, 12 janeiru sobre ezekusaun orsamentál iha rejime duodesimál”, tenik Ministru Reforma Lejislativa no Asuntu Parlamentár, Fídelis Leite Magalhães, ba jornalista sira hafoin reuniaun ezekutivu remata iha Palásiu Governu, ohin.

Fídelis hatutan alterasaun ne’e hodi fasilita ezekusaun rejime duodesimál ba governu atuál hodi kobre funsionamentu mákina Estadu, tanba governu ne’e foin hahú mandatu desde simu pose iha loron 22 juñu foin lais ne’e.

“Alterasaun ne’e atu inklui duodesimál ida agora halo kobertura ba funsionamentu mákina VIII Governu, tanba rejime antes ne’e dehan ba VII Governu, ne’e mak altera ba VIII Governu, hafoin uza osan ne’ebé mak rejime duodesimál ne’e iha atu halo pagamentu pensaun ba idózus, veteranus, bolsa da mãe no seluk tan”, dehan.

Governante ne’e hatutan tan pedidu transferénsia husi fundu petrolíferu ho montante US$140 milloen ba fulan jullu no agostu ne’ebé horisehik lori ona ba Parlamentu Nasionál (PN), bele efetua pagamentu ba saláriu, bens no servisu, transferénsia públika hanesan pensaun sira, no seluk tan. Osan ne’e sei aumenta ho milliaun US$20 ba kofre estadu no milliaun US$15 husi reseitas doméstikas.

Nia mós dehan parte governu sei estuda opsaun balun atu asegura funsionamentu mákina Estadu to’o tinan 2018 remata, enkuantu OJE ba tinan 2019 sei halo debate iha 15 outubru.

“Ami halo kálklu to’o tinan 2018 remata presiza hira, detallas ami sei estuda, maibé ida ne’e mós depende ba fatór barak, sei iha mudansa no alterasaun barak, tanba ne’e tenke iha relasionalizasaun, tanba saida mak tenke uza osan ne’e”, katak.

Ministru ne’e katak tan plafon orsamentu tinan 2018 tomak, inklui atu gasta husi fulan agostu to’o dezembru ne’e iha opsaun balun, maibé seidauk deside tanba ne’e seidauk bele fó sai ba públiku.

Entretantu, alterasaun ne’e permite durante vijénsia rejime duodesimál, vigora rejime alterasoens orsamentais ne’ebé rezulta Lei Orsamentu no Jestaun Finanseira nomós dekretu governu ba ezekusaun orsamentál ba 2017.

Nune’e mós alterasaun orsamentál sira sujeita ba limitasaun impostu husi duodésimu ne’ebé atibui ba identidade ida-idak.

Jornalista: Julia Chatarina

Editora: Rita Almeida

HUSIK IDA HATÁN