FRETILIN La Ignora Nesesidade Povu

0
88
Foto google.

DILI, (TATOLI) – Bankada partidu Frente Revolusionária Timor-Leste Independente (FRETILIN) liuhosi deklarasaun polítika iha plenária tersa ne’e klarifika katak pozisaun bankada ho mosaun rejeisaun kontra programa Governu da-ualu ne’ebé aprezenta la signifika ignora nesesidade povu nian.

“FRETILIN hakarak reafirma katak mosaun rejeisaun ida ne’e la signifika ignora  nesessidade povu nian, tanba governu ne’ebé de’it iha dever atu responde ba nesessidade ida ne’e, maibé ho programa ne’ebé governu  ida ne’e hatudu, buat ida ne’e sei la realiza”, tenik deputadu Joaquim dos Santos Boraluli liuhosi deklarasaun polítika iha plenária, ohin.

Nia hatutan bankada rejeita tanba la responde ba nesessidade no kontextu atuál moris povu nian, la reflete mós moris nasaun nian, no la reflete mós kapasidade governu nian atu ezekuta iha mandatu tinan lima.

“FRETILIN rejeita programa ne’e, tanba programa ne’e rasik, ou makina ne’ebé tuir loloos tradús programa ida ne’e hodi responde ba nesessidade povu nian, fraku no labele inspira konfiansa  atu ezekuta programa ne’ebé mosu iha uma fukun ida ne’e”, dehan tan.

Deputadu ne’e konsidera dadus ne’ebé aprejenta iha programa nomós tuir Primeiru-Ministru nia diskursu, barak la loos no dadus seluk mak la’ós atualizadu.

Alende ne’e, FRETILIN observa aprejentasaun dokumentu  programa governu, iha estrutura ida hanesan manifesta ba kampaña ho promessa sira halo ne’ebé tempu ne’ebé determina ona. 

“Tanba ida ne’e, FRETILIN konsidera la realístiku ba tempu governasaun ne’ebé Governu iha no hatudu momos katak  programa ida ne’e tomak sei labele implementa iha tempu ida badak, no kari hela rai-rahun ba povu nia matan, tanba ne’e mak FRETILIN hanaran lista de kompras”, katak.

Nune’e mós liuhosi deklarasaun ne’e, bankada konsidera programa governu la klaru iha relasaun ba projesaun ne’ebé programa  ida ne’e bele atinje, espesifikamente iha tinan lima nia laran.

“Programa ne’e aprejenta meta ne’ebé jerál tebes no programa ne’ebé aprejenta ba apresiasaun la hatudu klaru kona-ba ligasaun entre  objetivu, meta  no asaun”.

Biban ne’e, bankada husu parte hotu nia responsabilidade no diálogu polítiku atu buka konsensu kona-ba Estadu nia estabilidade governativa.

Nune’e mós husu ba sidadaun hotu atu kontribui ba estabilidade governativa tuir ida idak nia kbi’it, liu-liu fó respeitu ba titulár orgaun soberania nian. Ba Veteranu sira atu hamutuk iha asaun hodi hadi’a povu nia moris no hametin Estadu RDTL.

Entretantu mosaun rejeisaun husi bankada iha loron datoluk ba aprezentasaun programa Governu iha loron 27 jullu foin lais ne’e la passa ho votu a favor 24, kontra 36 no abstensaun 4, tanba ne’e programa ezekutivu liu.

Jornalista: Julia Chatarina

Editora: Rita Almeida

HUSIK IDA HATÁN