DNTT no Polísia Kontinua Fó Informasaun Kona-ba Estrada Ne’ebé Uza Sentidu Úniku

0
83
Foto/Google.

DILI, (TATOLI) – Diresaun Nasionál Transporte no Terrestre (DNTT) ho Polísia Tránzitu sei tenta nafatin fó informasaun ba públiku liuliu kondutór no motorista sira kona-ba estrada sira ne’ebé mak halo ona sentidu úniku tanba daudaun ne’e balun seidauk komprende liuliu estrada Bairru-Pité, Fatuk-Metan no Hudi-Laran.

Diretór Nasionál Transporte no Terrestre, Natalino de Rosário, hatete antes halo sentidu úniku diresaun fó sai ona avizu ba kondutór no motorista sira no tau ona sinál sira iha estrada sira ne’e.

“Husi Fatuk-Metan nia atu mai ne’e iha ona sinál proibidu tama iha ne’e (dilarang masuk). Parte husi Bairru-Pité atu bá fali Hudi-Laran mós tau ona sinál iha ne’ebá no polísia tau tan borraxa boot iha ne’ebá, mas dalaruma balun hatene mas sira koko atu liu fali husi ne’ebá”, Natalino dehan iha Balide, ohin.

Natalino de Rosário hatutan mós dalaruma (kondutór) balun mai husi foho laiha informasaun sobre sentidu úniku no piór liu mak balun lakomprende sinál sira, tanba ne’e mak sira saruntu tama de’it.

“Ami ho polísia tenta nafatin atubele hato’o informasaun ba komunidade liuliu sira ne’ebé lori karreta ho motór, ”katak tan.

Aleinde ne’e sei halo mós koordenasaun ho munisípiu Dili ho razaun parte loraik sempre hamosu engarafamentu iha estrada diresaun mikrolete 07 no Batallaun Orden Públiku (BOP) nian, tanba negosiante sira fa’an sasán iha estrada ninin.

“Agora mós ita haree husi parte Fatuk-Metan nia mai to’o iha pertigaan Hudi-Laran estrada foun ne’e nia tenke sees ba ne’ebá. Ida fali kona husi Kakau-Lidun nian agora bele mai, tanba ne’e mak motorisra balun seidauk komprende ida ne’e no dalaruma sira haksesuk malu iha ne’ebá”.

Ho kestaun sira hanesan ne’e DNTT halo ona enkontru ho Komandante Polísia Nasionál Tránzitu nian atu haree filafali oinsá maka halo peskiza ida sobre volume karreta husi Kakau-Lidun nia mai depois husi Perumnas nian karreta barak oinsá, nune’e husi kruzamentu ba to’o fatin sira ne’e halo sentidu úniku hotu de’it.

“Maibé ami sei halo survey ida tanba ta’uk mak ita halo sentidu úniku hotu bá ne’ebá, tanba daudaun karreta balun bele husik mai liu, balun lahusik para hamenus engarafamentu”, tenik tan.

DNTT mós sei halo mós peskiza iha fatin seluk atubele implementa planu ne’ebé iha mak sei halo sentidu úniku iha estrada balun.

Sobre sentidu úniku ne’ebé implementa ona ne’e iha dalan Bidau nia la’o ho di’ak, entantu iha Bairru-Pité sei iha problema uitoan mak husi kruzamentu bá to’o Kakau-Lidun.

“Tanba balun hatene katak bá ne’e sentidu ida de’it ne’ebé sira taka tomak de’it no iha ne’ebá mai mós laiha sinál, kuandu laiha sinál entaun sei bele sentidu rua (two way) nafatin, tanba ne’e maka ami ko’alia ona ho komandante tránzitu para halo observasaun filafali, kuandu bele halo sentidu úniku to’o ne’ebá ou oinsá depende ba observasaun ida ne’e. Survey ne’e ami sei halo iha segunda ou tersa hanesan ne’e para semana ida tan bele halo implementasaun”.

Jornalista: Maria Auxiliadora

Editora: Rita Almeida

HUSIK IDA HATÁN