BNCTL “Loke Liras” iha UNTL

0
264
Diretór BNCTL Brígido de Sousa. Foto TATOLI: Rafy Belo

DÍLI, (TATOLI)-Banku Nasionál Komérsiu Timor-Leste (BNCTL-sigla iha portugés) “loke liras” iha Universidade Nasionál Timor Lorosa’e (UNTL), hodi fasilita servisu universidade públika ne’e nian, inkluzivamente pagamentu propina husi estudante sira.

“Ida ne’e nu’udar inisiativa konjunta ida husi Universidade Nasionál Timor Lorosa’e (UNTL) no BNCTL, ne’ebé ma kami konkorda iha tinan kotuk hodi estabelese unidade ida iha ne’e hodi fasilita pagamentu propina estudante,” informa Diretór BNCTL Brígido de Sousa ba jornalista sira iha kampus sentrál, UNTL, Díli, ohin.

Diretór ne’e relembra informasaun husi reitór UNTL, Francisco Miguel Martins nian katak iha estabelesimentu ensinu ne’e estudante kuaze rihun tolu nolu no ativu rihun 18 resin, tanba ne’e mak UNTL no BNCTL hamosu inisiativa hodi estabelese unidade ida iha universidade ne’e. “Liuhusi diskusaun naruk, ami konkorda katak loke unidade ida iha ne’e (UNTL),” haktuir Diretór BNCTL Brígido de Sousa.

Nia sita nafatin reitór UNTL nian katak estabelesimentu unidade BNCTL nian iha UNTL tanba mós ejizénsia husi órgaun estadu sira atu uza osan di’ak liutan hodi evita mal administrasaun; tanba ne’e, pagamentu halo liuhusi banku.

“BNCTL hanesan banku estadu iha obrigasaun atu presta ami-nia servisu ba instituisaun sira hotu, hanesan mós UNTL; la’ós haree de’it husi aspetu negósiu nian. BNCTL hakarak halo tan espansaun, loke tan nia atendimentu sira hodi fó prestasaun barak liutan ba kliente sira hodi hetan asesu husi BNCTL,” dehan ezekutivu ne’e.

Iha fatin hanesan, diretora jerál ensinu superiór, siénsia no teknolojia, Elsa Maria Correia afirma, inagurasaun unidade BNCTL iha UNTL, marka tan istória interesante ida, atu ajuda, apoiu estudante sira.

“Ho ida ne’e fasilita liutan ba propinas; atendimentu ba estudante la’o di’ak liutan,” subliña diretora ne’e.

“Ho estabelesimentu ida ne’e BNCTL bele dezenvolve liutan ita-nia ensinu superiór hodi ba oin bele kontribui ba dezenvolvimentu Timor-Leste nian,” reforsa tan Diretora Maria Elsa Correia hodi hakotu.

Inagurasaun, unidade BNCTL, ohin, iha UNTL partisipa mós husi estrutura makro no mikro UNTL nian inklui konvidadu onradu sira.

To’o oras ne’e, konta hamutuk ho UNTL, BNCTL iha ona sukursál 13 no ajénsia hitu. Tuir planu, sei loke tan iha Maubesi-Ainaro, no Díli rasik, iha Becora.

Jornalista: Rafy belo

Editór : Manuel Pinto

HUSIK IDA HATÁN