ADB Hato’o Votu Susesu Ba Governu no Prontu Kolabora

0
115
Ministru Reforma Lejislativa no Asiuntu Parlamentár, Fidelis Leite Magalhães bainhira dada lia ho Country Director Timor-Leste Resident Mission Pacific Departement, Paolo Spantigati iha ninia gabinete. Imajen Media MRLAP

DILI, (TATOLI) – Asian Development Bank (ADB) liuhusi nia Country Director Timor-Leste Resident Mission pacific Departement, Paolo Spantigati, hasoru malu ho  Ministru Reforma Lejislativa no Asiuntu Parlamentár, Fidelis Leite Magalhães, hodi espressa votu susesu ba governu foun no prontu kolabora.

“Ohin Asian Development Bank mai atu aprezenta deit ninia votus de parabéns ba governu foun no espera bele hetan susesu iha governu ida ne’e. Sira hakarak bele iha kooperasaun ne’ebé metin liután ho governu Timor-Leste ba futuru”, tenik ba jornalisa sira iha Palásiu Governu, ohin.

Hodi hatutan, Timor-Leste hola parte ona iha ADB hanesan banku ba infraestrutura ida no organizasaun ida ne’ebé mak hanesan organizasaun multilaterál ba país membru sira.

Governante ne’e akresenta ADB nia kooperasaun barak mak nia halo no país membru sira, inklui ba governu Timor-Leste iha área infraestrutura hanesan estrada, apóiu ba bee no saneamentu.

“Sira mós fó apóiu tékniku ba ita nia rai, entaun sira nia kolaborasaun no kooperasaun ho governu  importante, liu-liu iha dezenvolvimentu fíziku iha ita ninia rai. Nu’udar país membru, ADB ninia atuasaun no apóiu mai husi pedidu govenu bainhira presiza”, katak.

Parte seluk Paolo Spantigati nu’udar reprezentante ADB felisita governu foun no prontu ajuda governu.

“Hau lori Asian Development Bank nia naran atu felisita governu foun no prontu atu suporta reforma ekonómiku no ami hakarak ajuda governu atu dezenvolve setór privadu no kria kampu traballu ba timoroan”, tenik

Nia dehan tan prontu suporta governu no fiar tinan lima ba oin bele servisu di’ak liután ho VIII governu konstitusionál.

Biban ne’e nia mós kongratula ba eleisaun antesipada parlamentár ne’ebé la’o ho di’ak no hakmatek hodi kompara ho nia país orijen.

“Ha’u husi italia ne’ebé hanesan país ho turbulénsia polítika barak, tanba ne’e ami sente ida ne’e normál, ha’u sente país ne’e iha maturidade, ne’e ami sente di’ak sai parte husi servisu governu”.

Antes ne’e ADB ne’ebé hanesan parseiru dezenvolvimentgu fó empréstimu ba governu hodi hadi’a estrada Tibar-Likisa, Tibar-Gleno, estrada Baukau-Vikeke, estrada diresaun Manatutu-Baukau no projetu infraestrutura seluk tan ho montante boot maibé governu mós konsege selu ona empréstimu balun.

Jornalista: Julia Chatarina

Editora: Rita Almeida

Notísia ne’ebé relasiona: http://www.tatoli.tl/2017/03/governu-aprova-pagamentu-ho-usd-ba-adb

http://www.tatoli.tl/2018/01/adb-fo-impresta-tan-osan-hadia-estrada-baukau-vikeke/

Governu Aprova Atualizasaun Kontratu Empréstimu Entre Timor-Leste no ADB

HUSIK IDA HATÁN