Aban, KSDS Enkontru Deside Ezonera Brigadeiru Filomeno

0
235
Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, halo intervista ho jornalista sira hafoin enkontru ho Xefe-Estadu. Foto Xisto Freitas

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, hateten aban (5/7), Konsellu Superiór Defeza no Seguransa (KSDS) halo reuniaun hodi deside ezonerasaun ba Brigadeiru Jenerál, Filomeno Paixão.
“Antes atu ezonera ne’e sein dúvida Prezidente-Repúblika konvoka reuniaun Konsellu Superiór Defeza no Seguransa atu rona depois sei marka loron ba tomada pose”, Lere hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Xefe-Estadu, Francisco Guterres Lú Olo.

Lere preokupa to’o ohin loron Ministru Defeza seidauk simu pose, tanba ne’e impede solusaun atu rezolve difikuldade iha F-FDTL.

“Ami nia dokumentu preparadu ona hein Ministru Defeza. Ministru sira seluk ne’e seidauk tomada pose ne’e ami ladún importa, maibé pelumenus Ministru Defeza ne’e simu tomada pose para bele halo serbisu”, haklaken.

Lere haktuir, foin lalais, Konsellu Ministru haruka ona karta mai Prezidente-Repúblika atu halo ezonerasaun ba Brigadeiru Filomeno.

Antes ne’e, kandidatu Ministru Defeza, Filomeno Paixão, la konsege simu pose iha faze dahuluk, tanba kestaun administrasaun. Katak, presiza ezonerasaun hosi Prezidente-Repúblika.

Jornalista: Xisto Freitas

Editora: Rita Almeida

HUSIK IDA HATÁN