António da Conceição Ho Jacinto Barros Hato’o Agradesementu Ba Funsionáriu MKI

0
128
Eis Vise-Ministru MKI, Jacinto Barros. Foto Facebook/Konsellu Imprensa.

DILI, (TATOLI) – Eis Ministru Komérsiu no Indústria, António da Conceição no Vise-Ministru, Jacinto Barros, agradese ba kooperasaun ne’ebé hala’o iha Ministériu Komérsiu no Indústri (MKI) iha Sétimu Governu Konstitusionál nian husi minutu ba oras to’o fulan sia serbisu hamutuk iha instituisaun ne’e.

“Agradese ba hotu-hotu durante fulan sia husi minutu ba oras, ba fulan sura to’o tinan, maibé serbisu hamutuk iha ne’e hanesan han ruma karik midar no siin, ai-manas ha’u sente hotu, ne’ebé ha’u haree kolega (funsionáriu) sira serbisu maka’as”, Jacinto hato’o iha ámbitu despedida iha Bebora antes halo transferénsia podér ba Ministru Estadu Prezidénsia Konsellu Ministru, Hemenegildo Pereira, iha Palásiu Governu, ohin.

“Ha’u hakarak hatete ita-nia Governu laiha Governu Fretilin-PD, realidade hanesan ne’e, maibé bainhira tomada pose ona ne’e Governu Konstitusionál. Bainhira kolega sira husi AMP mai seidauk tomada pose sei AMP, maibé tama ona tomada pose ne’e Governu Konstitusionál, ne’ebé ita hotu tenke kumpri ba ita-nia Governu”.

Hatutan maski sira sai ona, maibé iha liur sei kontribui nafatin ba Estadu ne’e maski sa’e karreta ketak-ketak, maibé tama hamutuk uma ida ita Governu ida de’it.

“Ne’ebé husu ita hotu tenke hamriik tebe-rai, hakarak foti rai ida ne’e bá oin. Serbisu di’ak nafatin tanba ita-nia rai presiza ita hotu nia kontribuisaun, uitoan ka barak, boot ka ki’ik ita hotu tenke kontribui tanba ida ne’e presiza duni atu halo, ema seluk la mai só timoroan duni, tenke lolo liman ba malu, ita tenke otimista katak Oitavu Governu Konstitusionál tenke la’o bá oin. Obrigadu barak ba ita-nia serbisu hamutuk”, agradese.

Entantu iha Governu Daualuk ne’e MKI seidauk iha ministru, nune’e transferénsia podér ne’e ba Ministru Estadu Prezidénsia Konsellu Ministru, Hemenegildo Pereira, no ohin eis vise-ministru hamutuk ho ekipa ministériu nian halo ona iha Palásiu Governu.

“Agora daudaun ita tama ona dia 4, sertamente implikasaun administrativa hahú tiha ona kuandu Governu ida ne’e toma pose tanba ne’e mak ami mós laiha ona pozisaun atu asina dokumentu sira ne’ebé iha. Buka atu fó kontinuidade ami mós tende ser entrega ona responsabilidade ida ne’e”, katak António iha Bebora.

Nune’e atuál deputadu ne’e dezeja atu serbsiu iha MKI bele la’o bá oin ba povu no nasaun. “Ha’u hakarak agradese funsionáriu sira hotu, obrigadu ba hotu-hotu nia apoia”, tenik tan eis-ministru ne’e.

Jornalista: Maria Auxiliadora

Editora: Rita Almeida

HUSIK IDA HATÁN