Reitór UNTL, Francisco Miguel Martins. Foto Tatoli/Egas Cristovão

DILI, (TATOLI)-Universidade Nasionál Timor Lorosa’e (UNTL) la abandona nia bolseiru sira ne’ebé hala’o estudu iha estranjeiru, liuliu Portugal.

Tuir kontratu bolsa estudu ne’e transfere semestrálmente ka kada fulan neen dala ida kompara ho antes ne’e trimestrál, fulan tolu dala ida.

“UNTL la abandona. Kontratu ne’ebé iha, asina hamutuk ho UNTL, hodi transfere sira-nia (bolseiru) bolsa estudu de seis à seis meses. Ita iha tempu eh períodu ida ne’e; só fulan haat. Sira ezije ona, dehan katak abandona. Lae! Sei falta fulan rua,” informa reitór UNTL, Francisco Miguel Martins ba jornalista sira iha auditóriu UNTL, ohin, hodi konfirma informasaun husi imprensa balun katak Bolseiru UNTL iha Portugal Hetan Krize Finanseiru.

Reitór Francisco Miguel Martins konsidera mós katak dala ruma bolseiru sira mak ladauk entende didi’ak kona-ba konteúdu kontratu ne’ebé bolseiru UNTL sira bainhira asina hamutuk ho universidade.

“Konteúdu kontratu ne’e, iha ne’ebá hateten katak transferénsia bolsa ne’e semestrál; fulan neen dala ida. Ida uluk liubá, tinan kotuk transferénsia trimestrál; fulan tolu dala ida. Fulan neen dala ida ne’e mak komentáriu katak abandona, lae!,” klarifika reitór ensinu superiór públiku ne’e.

Reitór hateten katak UNTL iha responsabilidade boot atu responsabiliza nia profesór sira  tomak hodi nune’e sira bele konsentra ba sira-nia estudu sira. Kona ba transferénsia bolsa estudu ba bolseiru UNTL sira iha estranjeiru, ne’ebé implementa husi reitoria anteriór sira, nia halo reforma tanba antes ne’e transferénsia liuhusi universidade, nune’e implikasaun katak bolsa menus tan hetan ku’a.

“Entaun ha’u halo reforma polítika ida ne’e, transfere diretamente ba sira-nia (bolseiru) konta bankária ida pur ida katak mil duzentos cinquenta por mês. Sira iha osan livru ninian, saúde ninian, rezidénsia ninian,” akresenta Reitór Francisco Miguel Martins.

Nia mós informa katak bolsa estudu UNTL nian ne’e boot kompara ho Ministériu Edukasaun nian katak Ministériu Edukasaun mós fó bolsa estudu ba bolseiru hodi estuda iha Portugal maibé menus; 600 ka 700 itál.

“1.200 itál, sei iha osan transporte ba mai; kuandu ba no fila fali mai i sei iha osan peskiza 4000 ba siénsia sosiál no siénsia umana, 4.500 ba siénsia exata nó mós siénsia Naturais,” revela reitór Francisco Miguel Martins.

Reitór ne’e mós informa katak universidade hatene preokupasaun bolseiru sira nian maibé sira mós simu sira-nia saláriu tanba hanesan funsionáriu públiku.

“Ha’u sempre fó hatene. Kuandu molok sira sai ne’e, ha’u fó briefing katak labele dezakredita. Imi komprende tanba evolusaun tempu fará mais ho ita-nia evolusaun polítika ida ne’e. Ne’e afeta buat barak,” informa reitór ne’e.

“Ita-nia Orsamentu Jerál Estadu la iha, ita Fundu Dezenvolvimentu Kapitál Umanu seidauk definitivu ba tinan ida ne’e nian. Ita-nia governu mós seidauk kompleta, foin mak aprezenta programa, orsamentu seidauk aprezenta, aprovadu ka lae, ne’e husi Parlamentu Nasionál. Depende ona ita-nia dinámika polítika país nian. Labele fó kulpa ba reitór katak reitór mak abandona. Lae! Ita-nia dinámika polítika país nian mak ita hotu osan la iha,” nia hatutan .

Entretantu, Reitór Francisco Miguel Martins informa katak bolseiru UNTL iha Portugal purvolta na’in 80; barak liu mak doutoramentu no mestradu. UNTL haruka nia bolseiru sira la’ós de’it ba Portugal maibé mós Japaun, Filipina, Indonézia, Nova Zelándia, Austrália, Estadu Unidu Amérika (EUA) katak bolseiru UNTL sira iha kontinente tomak hanesan Áfrika, Ázia, Austrália, Amérika no Europa.

Bolseiru sira ne’e maioria profesór UNTL, kuadru UNTL sira inklui funsionáriu sira hodi eleva sira-nia kualidade hanesan investimentu ida atu eleva sistema edukativu iha universidade ne’e.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here