Semináriu filozófia internasionál dahuluk. Foto FB: Edite Castro

DÍLI, (TATOLI)-Universidade Nasionál Timor Lorosa’e (UNTL), liliu Fakuldade Filozofia no Siénsia Umana (FFSU) konvida péritu filozofia internasionál koñesidu, Bortollo Valle, husi Pontifísia Universidade Católica Paraná, Brasil, hodi fahe koñesimentu kona-ba “Jogo de linguagem Segundo Wittgenstein”.

Dekanu FFSU, Martinho Boromeu informa katak sentidu husi semináriu internasionál filozofia dahuluk ne’e ko’alia kona-ba jogu linguajen tanba refere mós ba filozofia. Konstrusaun identidade ne’e pragmátiku oituan ba realidade.

“Entaun iha ne’e, konjugasaun entre hanoin filozofia ne’ebé babain ema dehan aat ne’e, aat liu, ho realidade ne’ebé ita enfrenta. Nasaun iha faze konstrusaun estadu, ita hanoin oinsa konstrusaun identidade, maibé husi universidade, konstrusaun ba joven, identidade. Ne’e sentidu tomak husi semináriu ne’e,” informa dekanu Martinho Boromeu ba jornalista sira iha salaun auditoria, UNTL, ohin.

Enkuantu, Reitór Francisco Miguel Martins akresenta katak UNTL sempre tau konsiderasaun hodi marka prezensa péritu nasionál no internasionál koñesidu husi fatin oioin iha mundu hodi partilla koñesimentu hodi enrikese ka hariku liutan koñesimentu estudante nian.

“Ita presiza konvida tan mai, halo palestra sientífika para enrikese, eleva kualidade, koñesimentu iha área idaidak nian, liliu ba estudante sira ne’ebé mak estuda iha filozófia,” dehan reitór UNTL ne’e.

Entretantu, iha semináriu internasionál ne’e, reitór Francisco Miguel Martins halo mós aprezentasaun kona-ba “Língua Portuguesa como Língua de Construção da Identidade” nomós husi profesór brasileiru ida tan ho naran Alessandro Bicca kona-ba “Pluralidade e Individualidade: A Dialetica Construção da Identidade”.

Semináriu internasionál ne’e, alende partisipa husi estudante UNTL sira inklui mós estudante ISFIT (Instituto de Filosofia e da Teologia), Fatumeta, Díli.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here