Ministru Negósiu Estranjeiru no Kooperasaun, Dionísio Babo

DILI, (TATOLI) – Ministériu Negósiu Estranjeiru no Kooperasaun (MNEK) reprezenta Timor-Leste (TL) sei partisipa abertura reuniaun ministeriál ASEAN (Association of South East Asian Nation) ba dala 25 iha Singapura, hahú loron 2 to’o 4 agostu 2018.

“Dionísio Babo Soares, Ministru Negósiu Estranjeiru no Kooperasaun, sei lidera ekipa hosi MNEK hodi partisipa iha serimónia abertura Reuniaun Ministeriál ASEAN ba dala 51 no Fórum Rejionál ASEAN ba dala 25 iha Singapura, iha loron 2 to’o 4 agostu 2018, hodi responde ba konvite hosi Ministru Negósiu Estranjeiru Repúblika Singapura, Vivian Balakrishnan”, haktuir MNEK liuhusi komunikadu diriji mai redasaun TATOLI, ohin.

Tuir komunikadu enkontru nível Ministeriál ASEAN (AMM, sigla inglés), hala’o kada tinan no konvida Ministru Negósiu Estranjeiru hosi nasaun 10 membru ASEAN nian.

Timor-Leste sempre hetan konvite hodi partisipa iha serimónia abertura ba eventu ida importante iha rejiaun Sudueste Azeátiku ne’e.

Ministru Babo Soares mós sei partisipa iha Fórum Rejíonal ASEAN (ARF) ba dala 25 iha loron 4 Agostu 2018, ne’ebé sei partisipa hosi Ministru Negósiu Estranjeiru hosi nasaun 27 membru ARF, no Ministru Babo Soares sei hato’o deklarasaun iha sesaun troka ideia nian.

ARF ne’e rasik hanesan forum hodi troka vizaun polítika no asuntu seguransa ne’ebé afeta ba rejiaun no liután.

Iha okaziaun ne’e mós, Ministru Babo Soares sei aproveita oportunidade hodi hala’o enkontru kortezia ho ninian omólogu hosi nasaun membru ASEAN sira ne’ebe mak hola parte iha Parséiru Dialógu ASEAN.

Xefe Diplomasia timoroan mós sei ba partisipa iha Southwest Pacific Dialogue hodi troka hanoin iha dezenvolvimentu no konektividade rejionál. Southwest Pacific Dialogue (SwPD) sai hanesan forum ba diálogu ba nasaun sira hanesan Austrália, Filipinas, Indonézia, Papua Nova Guinea, Nova Zelándia no Timor-Leste rasik.

Hafoin enkontru AMM/ARF, ministru sei kontinua ninian viajen hodi atende konferénsia Ministeriál Bali Process ne’ebé sei hala’o iha Bali, Indonézia hahú hosi loron 6 to’o 7 agostu, 2018.

Ministru Díonisio Babo Soares ho delegasaun sei fila hikas mai Dili iha loron 8 agostu, 2018.

Jornalista: Rafy Belo

HAKEREK NO HATÁN

Please enter your comment!
Please enter your name here