DILI, (TATOLI) – Presiza duni polítika atu aumenta produsaun, nune’e atinje soberania ai-han, maibé sujere ba Governu Da-Ualu Konstitusionál atu adopta prinsípiu soberania ai-han nu’udar baze ba dezenvolvimentu setór agrikultura.

Kestaun ne’e relata hosi Analista Core Group Transparency-Timor-Leste (CGT-TL), Juvinal Dias, ba Tatoli iha nia kna’ar fatin, Fatumeta, tersa ne’e, hafoin fó sai submisaun hosi CGT-TL ba Parlamentu Nasionál kona-ba aprezentasaun programa Governu Da-Ualu Konstitusionál iha semana kotuk.

Juvinal akresenta programa ida ne’ebé realistiku liu ba Timor-Leste ohin loron no ba tinan lima oin mai maka oinsá asegura soberania ai-han, diversifikasaun hahan no menu povu nian, asegura kualidade nutrisaun molok hanoin ba esportasaun ba merkadu iha rai li’ur.

“Ami fiar katak orientasaun agrikultura ba merkadu sei obriga produtór sira hodi aumenta sira nia produsaun liuhusi dalan sira hanesan uza adubu, pestisida, inklui fini sira ne’ebé la orgánika ne’ebé ikus mai sei estraga ita nia kualidade rai agrikultór inklui estraga nutrisaun ba saúde populasaun nian”, Juvinal tenik.

Daudaun ne’e, nia haktuir Nasaun ninia produsaun ai-han sei menus liu kompara ho númeru konsumidór rai-laran, iha ne’ebé kada tinan númeru importasaun ai-han hosi rai-li’ur aumenta.

“Bazea ba relatóriu estatístika ba merkadoria 2016, Timor-Leste importa foos ho valór milaun $35,365, ne’e seidauk inklui miloen seluk ne’ebé mós tinan-tinan ita gasta ba iha modo tahan, ikan nomós produtu pekuaria”, nia adianta.

Tuir nia dependénsia Timor-Leste nian ba importasaun ne’e akontese, tanba valór produtu ai-han hosi rai-li’ur baratu liu kompara produtu ne’ebé prodús iha rai-laran.

Iha programa atuál Governu ne’e, Juvinal afirma sira apoiu ba planu produsaun no promosaun Kafé Orgánika ho kualidade di’ak, inklui liuhosi promosaun Kafé Timor iha nível nasionál no internasionál. Maske nune’e promosaun ne’e tenke liuhusi dalan ida ne’ebé bele atrai merkadu sira ne’ebé justu ba produtór sira.

Nia haklaken dalan urjénsia atu tau valór ba kafé Timor rasik maka hapara importasaun kualkér kafé hosi rai li’ur no promove indústria ba produsaun kafé iha rai laran nu’udar parte ida hodi substitui Timor-Leste nia dependénsia ba produtu kafé importasaun nian.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here