Ne'e mak situasaun iha área akontesementu. Foto FB Hadomi Timor

DILI, (TATOLI) – Pontu Fokál Formar (Formação Contínua de Professores), Armindo de Jesus Barros, hateten bairru portugés ne’e baibain profesór sira hosi Portugal mak iha ne’e hafoin ba hanorin iha munisípiu sira, maibé derepente de’it ahi han sala númeru tolu.

“Ami servisu hela iha Balide ne’eba no ami mai iha ne’e mós ahi han hotu ona, ami labele halo buat ida, tanba bombeiru sira mai halo ona atuasaun hodi hamate ahi”, Pontu Fokál Formar, Armindo de Jesus, ba Tatoli iha fatin akontesimentu Vila Verde, ohin.

Nia esplika rezidénsia ne’e profesór sira mak hela, maibé sira servisu iha munisípiu 12 inklui Rejiaun Administrativa Espesiál Oekusi-Ambeno (RAEOA), kuandu fim de semana mak sira mai, entaun sira hela iha uma hirak ne’e.

Dadaun ne’e profesór sira agora feriadu no balun ba ona Portugal. Profesór sira ne’ebé hela iha bairru portugés ne’e kuaze ema 20.

Enkuantu, funsionáriu ka cleaner ne’ebé servisu iha fatin ne’e konta kronolojia hosi akontesimentu. “Dadersan ha’u mai servisu, ha’u rai pasta ho telefone iha kuartu ida ne’e hafoin ha’u ba halo limpeza iha sala 14, maibé derepente de’it kolega ida bolu ha’u dehan ahin han ona uma, no ha’u halai mai ahi suar maka’as ona”, Maria Olgita haktuir.

Akontesimentu ne’e akontese maizumenus tuku 11:00. “Ha’u mós la hatene motivu ahi han ne’e no ohin polísia mai ona investiga ha’u, maibé ha’u konta tuir ida ne’e”, katak tan.

Sasan hirak ne’ebé mak ahi han hanesan kama, armariu, livru ka dokumentu, liliu sasan hirak ne’ebé iha kuartu laran mak save metin.

Iha fatin hanesan, profesór portugés, Pedro Patricio, triste ho akontesementu ne’e tanba lakon sasan importante sira seluk.

“Ha’u iha servisu fatin, ha’u mós hetan telefone dehan ahi han ona uma, depois ha’u mai”, dehan tan. “Kauza ba akontesimentu ne’e sei iha prosesu investigaun hosi polísia”.

Iha rezidénsia portugés sala númeru tolu mak ahi han no restante di’ak hotu, tanba bombeiru sira salva lais hodi hamate ahi.

Entretantu, akontesimentu ne’e informa ona ba Ministériu Edukasaun ho Embaixada Portugál iha Timor-Leste.

Nune’e to’o agora seidauk hatene motivu akontesimentu, tanba sei iha prosesu investigasaun hosi polísia. Dadaun ne’e Tatoli seidauk hetan konfirmasaun hosi parte seguransa.

Jornalista: Zezito Silva

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here