Primeiru-Ministru, Taur Matan Ruak

DILI (TATOLI)–Primeiru Ministru (PM), Taur Matan Ruak, alerta ba sidadaun hotu liuliu ba veteranu sira atu sukat estrada no eletrisidade sein autorizasaun karik, di’ak liu hapara.

Tuir PM Taur Matan Ruak, Governu sei iha prosesu debate programa governu nian, no seidauk aprova hosi Parlamentu Nasionál (PN).

“Sidadaun sira liuliu veteranu sira labele halai uluk hodi sukat ka halo estrada no eletrisidade no seluk tan enkuantu programa governu seidauk hetan aprovasaun hosi parlamentu,” PM, Taur Matan Ruak, apela liuhosi debate programa governu nian iha PN, ohin.

PM konta katak foin lalais ne’e nia hetan veteranu balun dehan nia katak “maun ha’u ba halo eletrisidade ka sukat ida ne’ebé seidauk halo. Depois ha’u dehan ba nia nune’e; uluk ita iha ai laran kuandu tiru malu mate ne’e haree ona eletrisidade atu halo ka.”

Ho ida ne’e, eis gerrilleiru ne’e kompara katak, dala ruma ita la iha nosaun pratika ka arbitrária ou ida-idak halo.

“Ne’e la di’ak tanba kuandu ita halo servisu ne’e iha kontratu hosi governu, atu iha kustu finanseiru, atu jere osan di’ak ne’e oinsá, tanba saida mak atu halo servisu, se mak haruka, halo iha ne’ebé no bele ka lae,” PM Taur Matan Ruak fó hanoin.

“Ha’u aproveita apela ba sidadaun sira atu tau atensaun ba asuntu ne’e. Tanba atu halo servisu saida de’it presiza ho nia regra ka norma sira ne’ebé iha atu ita obedese ka halo tuir. La’ós halo buat ruma tuir ida-idak nia hakarak,” PM Apela.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here