Primeiru Ministru, Taur Matan Ruak aprezenta programa VIII Governu iha Parlamentu Nasionál. Foto Antonio Goncalves

DILI, (TATOLI) – Primeiru-Ministru (PM), Taur Matan Ruak, rekoñese jestaun ba bee-moos iha Timor laran tomak fraku no hasoru difikuldade, tanba konsumidór sira laiha disiplina.

“Ita la impoin regra, tanba ne’e maka ha’u hanoin karik ita hakarak jestaun ida di’ak ita tenke impoin regra. Regra ida maka konsomidór sira tenke selu no fó sansaun”, hatete iha intervensaun durante debate programa governu ba loron datoluk iha plenária, ohin.

Xefe Governu haktuir esperiénsia ida iha suku balun iha Iliomar (Lautém), autoridade sira aplika jestaun di’ak tebes ba bee-moos. Katak sé maka hakarak bee to’o uma, tenke selu dollar lima kada fulan no jestaun refere la’o di’ak to’o agora.

Taur tenik la’ós de’it autoridade sira maka kumpri lei maibé, hotu-hotu tenke kumpri tanba sidadaun sira normalmente ezije nai-ulun sira atu kumpri lei maibé sira la kumpri.

Governu liuhusi Ministériu Transporte ne’ebé responsabiliza ba bee-moos, nia haktuir ko’alia beibeik ona atu haree kestaun ba ida ne’e (bee-moos) no hadi’a mós instituisaun ne’ebé jere bee-moos.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here