Ministra Edukasaun, Dulce de Jesus Soares.

DILI, (TATOLI) – Ministériu Edukasaun, Juventude no Desportu (MEJD) klarifika mis-interpretasaun públiku liliu iha rede sosiál facebook kona-ba asuntu sistema dijitál iha prosesu aprendijazen ba ensinu pré-eskolár katak MEJD la’ós atu monta internet ka CCTV (closed-circuit-television) iha eskola, maibé implementasaun sistema monitorizasaun online iha pré-eskolár.

“Ministra edukasaun ba akompaña evaluasaun kona-ba implementasaun sistema sira liuhusi aplikasaun Kobo Toolbox, Whastapp group no google drive, la’ós monta CCTV”, klarifika Ministra Edukasaun, Dulce de Jesus Soares, liuhusi komunikadu imprensa ne’ebé ajénsia TATOLI asesu, ohin.

Liuhusi komunikadu imprensa ne’e Ministra Edukasaun, Dulce de Jesus Soares, klarifika mós iha fulan outubru 2016 Ministériu Edukasaun, liuhusi inspetór pré-eskolár uza ona sistema monitorizasaun online iha pré-eskolár ho aplikasaun Kobo Toolbox, Whastapp group no google drive.

Monitorizasaun ne’e uza teknolojia movel liuhusi tablet ho presu internet dolár 15 kada fulan. Inspetór pré-eskolár bele haruka/manda direta informasaun mai iha sentru informasaun nasionál Ministériu Edukasaun nian.

Agora dadauk, iha inspetór na’in 26, superintendente na’in 13, no staff inspesaun jerál MEJD na’in hitu, inklui totál ema na’in 46 mak uza hela tablet ne’e hodi kobre informasaun hosi teritóriu Timor-Leste laran tomak.

Sistema refere reduz ona viajen ka per-diem, tanba bele hetan lalais informasaun husi baze. Ezemplu, bainhira ita hakarak hatene kona-ba infrastrutura, ita bele loke google drive no haree kondisaun pré-eskolár 300 resin, ne’ebé inspetór sira atualiza.

Projetu ne’e realiza tanba kooperasaun entre MEJD ho governu Nova Zelándia, ne’ebé apoiu instrument tablet, motorizada sira no formasaun ba inspetór sira.

Promovedór ba sistema ida ne’e mak Ministra Edukasaun, Juventude no Desportu, Dulce de Jesus Soares, ne’ebá iha tempu ne’ebá sei asume pasta hanesan vise-ministra edukasaun iha VI Governu Konstitusionál no agora mós kontinua promove implementasaun programa refere.

Sistema husi programa ida ne’e hetan ona rekoñesimentu hosu reguladór Timor-Leste nian hanesan Autoridade Nacional de Comunicações (ANC) Timor-Leste.

Entretantu, klarifikasaun sira ne’e, governante ne’e klarifika relasiona ho entrevista ho media, iha Orchid Room, Timor Plaza, Díli, segunda (24/7), bainhira marka prezensa iha enkontru “Kontinuasaun husi Dezenvolvimentu Profisionál ba Inspetór Pré-Eskolár”, hodi esplika kona-ba implementasaun sistema dijitál iha prosesu aprendizajen ba Pré-Eskolár iha Timor-Leste.

Jornalista: Rafy Belo

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here