DILI (TATOLI) –Ministru Estadu Prezidénsia Konsellu Ministru, Agio Pereira, informa depois debate programa governu konstitusionál mak governu sei submete akordu Fronteira Marítima (FM) mai Parlamentu Nasionál (PN) hodi ratifika (Valida).

“Atu ratifika akordu Fronteira Marítima, depois programa governu mak foin governu haree asuntu ne’e hodi mai parlamentu,” Ministru Agio Pereira informa ba Ajénsia Tatoli iha PN, Ohin.

Ministru ne’e hatutan, Governu Konstitusionál Da-ualu seidauk tau iha ajenda, maibé atu ratifika akordu FM iha PN ne’e prosesu ida ne’ebé simples ona.

Enkuantu, debate programa governu hotu tiha mak haree asuntu ratifikasaun akordu FM hodi nune’e PN fó sai rezolusaun hafoin Prezidente Repúblika, Francisco Guterres “Lu-Olo” publika.

Entretantu, Timor-Leste halo ona istória iha 6 Marsu 2018, tanba Timor-Leste no Austrália asina ona Tratadu FM ida iha Sede Nasoens Unidas nian iha Nova Iorke.

Tratadu FM ne’e estabelese ba dahuluk FM permanente entre Timor-Leste no Australia iha Tasi Timor.

Asina Tratadu ne’e mak hakotu prosesu konsiliasaun obrigatóriu, tuir Nasoens Unidas nia Konvensaun ba Lei Tasi nian, ne’ebé Timor-Leste mak hahú iha fulan-abril 2016.

Tratadu ne’e estabelese FM permanente iha Tasi Timor bazeia ba lei internasionál, hodi hakotu Timor-Leste nia disputa Marítima naruk ho Austrália, hodi rekoñese Timor-Leste nia direitu ba nia tasi. Ho ida ne’e, asina Tratadu ne’ebé iha ona marka hakat importante ida ba Timoroan sira iha sira nia luta ba soberania kompleta no independénsia.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here