Foto/Google.

DILI, (TATOLI) – Relatóriu monografia agrikultura bazea ba dadus populasaun no umakain 2015 hatudu katak foinsa’e sira menus liu envolve iha área agrikultura kompara ho grupu idade sira seluk.

Diretór Peskiza Ministériu Agrikultura no Peska (MAP), Claudino Ninas Nabais, hatete husi númeru umakain rihun 200 resin ne’ebé evolve iha agrikultura halo mós agrupamentu bazea ba tinan ne’ebé indika ema ho idade 50 liu mak  nia porsentu boot liu mak 45.5 envolve iha agrikultura husi númeru 83.629.

“Entre 20 ba 29 anos (husi totál 15.571) iha de’it porsentu 8.5 ne’e hatudu katak ita-nia joven sira ne’ebé envolve iha área agrikultura ne’e menus tebes kompara ho grupu idade sira ne’e”, Claudino aprezenta iha lansamentu monografia agrikultura iha Diresaun Jerál Estatístika Kaikoli, ohin.

Husi dadus ne’e ema ho tinan 30-39 husi númeru 35.711 porsentu 19.4 mak envolve iha agrikultura no grupu idade 40-49 husi totál 47.633 porsentu 25. 9 mak envolve no idade menus 20 husi 1.089 porsentu 0.6 mak envolve mós.

Relasiona foinsa’e barak lakohi serbisu iha agrikultura, Claudino dehan MAP tau importánsia maka’as ba joven ne’ebé hakarak envolve iha agrikultura no programa ida mak kapasitasaun ba sira liuhusi subvensaun públika.

“Grupu joven sira ne’ebé suporta husi Ministériu Agrikultura la’o daudaun halo sira-nia atividade iha agrikultura”, katak tan.

Nia akresenta relasaun ho kapasitasaun, ministériu iha importánsia oinsá mak bele hetan koñesimentu iha área agrikultura, ezemplu mak manda joven balun bá Izraél para haree dezenvolvimentu agrikultura, tuir treinamentu, fila mai ministériu fó akompañamentu nafatin oinsá mak sira bele mobiliza joven seluk bele envolve.

Nia rekoñese tempu modernu agora joven barak mak lakohi tama iha área ne’e, tanba ne’e hanesan parte ida ne’ebé ladún fó benefísiu ida ba sira ka serbisu todan, maibé MAP tenta nafatin liuhusi maneira oioin liuliu kapasitasaun no eskola agríkola atu motiva sira tama iha agrikultura.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here