Enseramentu atividade Estájiu Komunitáriu FMSS. Foto: Media UNTL

DILI, (TATOLI) – Estajiáriu Fakuldade Medisina, Siénsia no Saúde (FMSS) hosi Universidade Nasionál Timor Lorosa’e (UNTL) identifika falta lixeiru no sintina ba komunidade Railaku, Munisípiu Ermera, bainhira hala’o sira-nia atividade estájiu saúde komunitária durante fulan rua, hahú 24 maiu to’o 24 jullu.

“Bazea ba dadus ami hetan, falta fatin lixu, sintina ba komunidade, tanba ne’e ami halo promosaun saúde nian; moras dermatitis, saúde ambientál, HIV/SIDA (Vírus da Imunodeficiência Humana/ Síndrome da Imunodeficiência Humana Adquirida-red), moras ne’ebé kauza husi fuma tabaku”, haktuir reprezentante estajiáriu, Adão do Carmo, ne’ebé TATOLI asesu liuhusi mídia komunikasaun UNTL, ohin.

Enkuantu, estajiária husi Suku Lauala, Natalia da Silva, dehan durante estájiu, identifikasaun problema ne’ebé sira iha mak partus husi inan sira.

“Problema ne’ebé ami hetan maka inan barak maka partu de’it iha uma, no barak mós lahatene sinál perigu sira partus nian, la tuir planeamentu familiar, hela fatin dook husi postu saúde no laiha parteira iha suku ne’e”, haktuir tan.

Iha biban ne’e, Prezidente Autoridade Munisípiu Ermera, José Martinho dos Santos, espera katak estudante sira ne’e sei sai profisionál saúde ne’ebé di’ak.

“Ha’u hein katak loron ba loron servisu aumenta dezenvolvimentu di’ak tanba saúde di’ak edukasaun di’ak, agrikultór di’ak, kontribui ba moris saudável. Tan ne’e ohin ami etrega fali imi ba universidade ho kondisaun hotu di’ak”, afirma.

Dekanu FMSS, João Martins, iha Edifísiu Administrasaun Glenu, apresia ho esforsu estudante sira-nian hodi koko halo diferénsia.

“Dadus ne’ebé aprenzenta hatudu katak ita-boot sira konsege halo diferensa hodi servisu hamutuk ho komunidade no autoridade lokál sira hodi buka oras ne’ebé komunidade bele fasilita informasaun”, dehan dekanu.

Profesór ne’e husu ba estrutura saúde Munisípiu Ermera katak dadus ne’ebé estudante sira aprezenta presiza konfirma ho dadus estatístika.

“Ami espera katak pedidu husi Prezidente Autoridade Munisípiu nian bele konvense Ministériu Saúde hodi envia tan profisionál sira saúde nian mai Ermera, tan UNTL kada tinan produs”, akresenta.

Entretantu, estudante FMSS ne’ebé hala’o estájiu saúde komunitária iha Munisípiu Ermera hamutuk na’in 124.

Estudante hirak ne’e, kompostu husi eskola superiór enfermajen na’in 64 no kursu parteira na’in 60.

Jornalista: Rafy Belo

HAKEREK NO HATÁN

Please enter your comment!
Please enter your name here