Diretór Jerál Estatístika Ministériu Finansas, Elias dos Santos Ferreira. Foto/MF.

DILI, (TATOLI)-Diresaun Jerál Estatístika (DJE)  Ministériu Finansas (MF) lansa tan ona relatóriu temátiku kona-ba fertilidade, mortalidade, kazamentu, agrikultura, karaterístiku uma-kain no riku-soin, juventude, jéneru, forsa laborál no Operational Data Store (ODS) ne’ebé uza sensu populasaun no uma-kain 2015 nomós dadus administrativu husi entidade no ministériu relevante.

Diretór Jerál Estatístika, Elias dos Santos Ferreira, hatete relatóriu monografia ne’e kontinuasaun husi sensu populasaun no uma-kain 2015 ne’ebé hanesan pakote ida tanba Timor-Leste halo ona sensu ba datoluk ona iha jullu 2015 no lansa relatóriu prelimináriu iha outubru tinan refere no liu tiha tinan ida lansa relatóriu finál iha novembru 2016 ne’ebé dadus ne’e publika to’o nivel suku.

“Inklui mós sensu fó filafali ne’ebé ita lansa iha 2017 ne’e relatóriu ba suku 442 ne’ebé kompostu husi indikadór 12 no ikus liu mak relatóriu temátiku”, Elias afirma iha lansamentu relatóriu iha Kaikoli, ohin.

Nia hatutan relatóriu temátiku ne’e kompostu husi 12 ne’ebé mak estuda kle’an liuliu ba edukasaun ne’ebé lansa tiha ona iha marsu 2018 no daudaun ne’e lansa tan relatóriu temátiku lima hodi finaliza relatóriu ida ne’e.

“Ita mós iha relatóriu projesaun sensu 2015 ne’ebé maka ita projeta populasaun entre 2015 to’o 2050 hodi nune’e Governu bele halo planu. Se ita hakarak halo planu ba 2020 ita tenke iha projesaun ba populasaun, ita labele tuur halo no ida ne’e mak importante”.

Iha relatóriu temátiku kona-ba agrikultura hakerek liu sobre dadus agrikultura ne’ebé mak iha sensu no publika tuir kada munisípiu atubele hatene katak munisípiu ida ema haki’ak animál hira, nia toos no natar hira depois nia produsaun hira hodi nune’e uza dadus ne’e halo planu ba dezenvolvimentu iha país.

Sobre dadus temátiku ne’ebé lansa ona kona-ba fertilidade iha dadus entre 2004 no 2015 fetilidade tun tanba iha 2004 fetilidade 7.6 no 2015 sensus hatudu 4.5.

“Se ita liga ba peskiza demografia saúde iha Timor-Leste ne’ebé hala’o iha 2016 ita iha komparasaun diferente iha desimál uitoan de’it 4.2, pur tantu ita-nia país iha fetilidade ne’ebé tun, ne’e hatudu katak di’ak no atividade liga ba saúde di’ak tanba ema agora lakohi oan barak no hakarak liu ba estuda, serbisu hodi nune’e iha espasu para oan tanba oan barak depois la eskola, saúde ladi’ak ne’e afeta ba ita-nia país”.

Hatutan sobre mortalidade iha nivel rejionál sei boot, maibé boot liu mak iha Aileu, Ermera mas kompara ho tinan sira kotuk ne’e agora di’ak tanba serbisu saúde la’o di’ak, edukasaun di’ak no ema ho edukasaun di’ak no loroloron haree televizaun tanba kuaze porsentu 85 asesu ba eletrisidade no iha televizasaun entaun komesa haree oinsá benefísiu ba edukasaun no saúde di’ak ba família.

Iha relatóriu temátiku ne’e hetan kontribuisaun husi ajénsia Nasaun Unida (UN) nian hanesan UNFPA, UNWoman, ILO, FAO no UNICEF hodi tulun halo elaborasaun ba relatóriu hirak ne’e.

Reprezentante United Nations Population Fund (UNFPA), Olof Ronny Lindstrom, hatete relatóriu temátiku sobre Jéneru no Dezenvolvimentu Sustentavel, xave lahusik ema ida iha kotuk.

“Sensu hanesan fonte prinsipál ba dadus kona-ba Objetivu Dezenvolvimentu Sustentavel. Ita haree oinsá maka sensu no dadus sira seluk bele uza hodi sukat no monitoriza progresu ba ODS”.

UNFPA orgullu bee kontribui ba produsaun publikasaun jéneru no ODS nu’udar xave hodi lahusik ema ida iha kotuk ne’ebé lidera husi UNWoman.

“Importante tebes informasaun sira ne’e asesivel ba ema hotu iha nasaun laran. Ami espera katak loron ida ne’e util, no ita hotu bele la’o bá oin hamutuk atu asegura katak dadus ne’ebé nakonu no riku ho informasaun sira bele utiliza ho di’ak ba dezenvolvimentu sustentavel país nian no iha benefísiu ba ema hotu”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here