DILI (TATOLI)—Líder Rezisténsia Nasionál Estudante Timor-Leste (RENETIL), kuarta ne’e iha Palásiu Prezidente Nicolau Lobato, Bairru Pité, hala’o soru-mutu ho Prezidente-Repúblika (PR), Francisco Guterres Lú Olo, hodi ko’alia kona-ba impase polítika iha rai laran.
RENETIL afirma katak apoia pozisaun polítika Prezidente-Repúblika hodi hametin boa governasaun.
Primeiru Vise Sekretáriu Jerál RENETIL, Francisco Belo no Prezidente Konsellu Sentrál, Carlos da Silva ‘Saky’, hateten situasaun polítika atuál presiza hetan solusaun lalais atu iha normalidade iha vida sosiál, ekonómia no polítika.
RENETIL kompriende ho di’ak tebes Prezidente-Repúblika nia pozisaun atu harii governu ida ho kredibilidade no louva Prezidente-Repúblika nia pozisaun, kompromete apoiu totál desizaun polítika ne’e.
RENETIL husu atu iha nafatin komunikasaun entre líder polítiku sira hodi solusiona problema nasaun nian.
Bazeia ba situasaun polítika atuál, RENETIL propoin katak atu hametin boa governasaun presiza mós iha lei ne’ebé regula personalidade sira molok okupa kargu polítika no antes okupa kargu polítiku ida, kandidatu sira tenke priénse kritériu ne’ebé lei defini.
Iha biban ne’e, Xefe Estadu apresia tebes RENETIL nia pozisaun no husu atu organizasaun ne’e kontinua serbisu hodi atinji nia misaun bazeia ba valór no prinsípiu sira ne’ebé husik hela hosi tempu rezisténsia ninian.
Prezidente-Repúblika husu ba RENETIL atu bele aprende hosi situasaun polítika ne’ebé akontese dadaun no bele kontribui ho di’ak liu-tan iha tempu agora no futuru.
Jornalista: Xisto Freitas
Editór : Manuel Pinto
