Primeiru Ministru, Taur Matan Ruak aprezenta programa VIII Governu iha Parlamentu Nasionál. Foto Antonio Goncalves

DILI, (TATOLI) – Governu Konstitusionál da-ualu liuhosi aprezentasaun programa husi Primeiru-Ministru (PM), Taur Matan Ruak, ba Parlamentu Nasionál hodi hetan aprovasaun hateten ambisaun atu kria fluksu anuál no sustentável.

“Ita iha ambisaun atu kria fluksu anuál no sustentável ida hamutuk vizitante 450.000, ne’ebé fahe ba ninia vertente oin-oin hanesan natureza, foho, istóriku, kulturál, gastronómiku no relijiozu, komunitáriu no etnográfiku, aventura no desportivu, ekolójiku ka simplesmente lazer, balneár no rekreativu nian”, katak iha plenária, ohin.

Nia hatutan Timor-Leste hetan proveitu, liuliu husi prezensa komunidade estranjeira hanesan osidentál, xina, malaiu no indú ka rejionál hanesan Japaun, Koreia Sul, Honkóng, Makau, ne’ebé hela iha ita-nia rain, no períodu férias, tinan foun no loron boot sira ka realizasaun eventu nasionál no internasionál boot sira.

Hodi konsidera setór turizmu hanesan mós setór tranzversál ida husi ekonomia, benefisia no promove investimentu ne’ebé hala’o hela iha infraestrutura bázika sira henesan estrada, portu, aeroportu, transporte, iha kapitál sosiál hanesan eskola téknika no politékniku otelaria nian, servisu restaurante nian, nomós iha konsumu sasán no servisu sira hanesan industriál, komersiál no rekreativu ho grau rentabilidade imediata ne’ebé aas. 

“Tanba ne’e, ita sei kontinua fó prioridade ba setór ne’e, ho konstrusaun Marina no Portu Kruzeiru nian ida iha Dili, reabilitasaun orla marítima hanesan liña ne’ebé haketak tasi no rai-maran iha Dili, valorizasaun Merkadu Tais hanesan pontu prinsipál turístiku ida mós no ne’ebé hetan vizita barak liu, estabelesimentu parke temátiku sira no diversaun nian sira, inklui parke akuátiku ka jestaun lafaek nian, zona turizmu nian sira ho informasaun sira ne’ebé di’ak liu no pakote turístiku abrajente sira”, katak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here