Hotel. Foto/Google.

DILI, (TATOLI)-Autoridade Inspesaun no Fiskalizasaun Atividade Ekonómika no Sanitária (AIFAESA) daudaun ne’e fó prioridade hodi halo inspesaun ba otél no apartamentu 41 iha Autoridade Munisipál Dili ne’ebé deskonfia laiha lisensa komersiál.

Diretór Operasaun AIFAESA, Gabriel da Costa, hatete AIFAESA liuhusi kooperasaun ho Minstériu Turizmu ne’ebé informa katak otél no apartamentu 41 ne’ebé halo atividade iha kapitál Timór ne’ebé konsidera laiha lisensa komersiál husi Servisu Rejistrasaun no Verifikasaun Emprezariál (SERVE), nune’e iha semana ne’e inspetór sira halo ona inspesaun bá fatin sira ne’ebé MT relata ba AIFAESA.

“Husi AIFAESA rasik iha segunda até a data komesa halo inspesaun bá fatin sira ne’ebé informasaun husi parte Ministériu Turizmu relata mai iha ne’e no agora daudaun inspesaun la’o hela bá fatin sira ne’ebé identifikadu ona, ne’ebé ami bá haree daudaun iha horisehik no hodibainrua (23-24/18) hahú husi parte Komoro nian”, Gabriel afirma iha Matadouru, ohin.

Nune’e iha inspesaun ne’ebé halo ona loron rua ne’e AIFAESA observa katak otél ualu husi lista otél hamutuk 41 ne’ebé tama ne’e iha lisensa, maibé iha otél rua ne’ebé komete infrasaun ba produtu ne’ebé liu prazu no hahú halo ona prosesu ba sira.

“To’o ohin loron inspesaun la’o hela no ami mós la’ós la’o haree ba otél de’it, maibé kontinua nafatin bá mós supermerkadu no loja sira ne’ebé ita haree maski situasaun polítika la’o, maibé tékniku la’o nafatin no ami iha difikuldade ba kombustivel, maibé realidade ami kontinua halo serbisu”, dehan.

Gabriel afirma MT identifika de’it otél 41 ne’e laiha lisensa, maibé iha inspesaun ba otél ualu entre 41 ne’e iha lisensa nune’e sei kontinua bá otél sira seluk.

“Durante ne’e ami foku liu ba restaurante sira no bá taka nomós loja sira, maibé apartamentu tanba sira (MT) fó informasaun nune’e ami sei kontinua ida ne’e hodi foku liu ba otél nomós supermerkadu hotu”.

Tanba ne’e iha semana ne’e no oin AIFAESA sei fó prioridade liu ba inspesaun bazea ba informasaun ne’ebé MT fó no tenke haree bainhira lisensa laiha AIFAESA sei prosesa sira.

“Tanba buat hotu kona-ba apartamentu, otél nomós restaurante tenke hetan rekomendasaun husi Ministériu Turizmu, ne’e automátikamente, maibé dalaruma indetifikasaun husi Ministériu Turizmu ne’e  iha otél barak ne’ebé loke sira laiha parseiru ho sira ida  nune’e identifika tanba sá ema sira ne’e lisensa laiha, maibé daudaun ami tama iha fatin ualu ne’e iha lisensa”.

AIFAESA nia serbisu haree liu ba lisensa bainhira tun ba terrenu mak haree katak empreza ne’e iha lisensa AIFAESA konsidera ne’e mak baze legál atubele halo atividade. “Kuandu husi Turizmu haree katak fatin ida ne’e seidauk hetan rekomedasaun ruma maka tenke halo konfirmasaun husi parte ne’ebé hasai lisensa”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here