PDHJ ohin entrega relatóriu lalaok eleisaun antesipada tinan ne’e ba orgaun relevante iha salaun CNE Kaikoli. Foto Egas Cristovão

DILI, (TATOLI) – Prevedoria   Diretu Umanu no Justisa (PDHJ-sigla portugés) ohin lansa relatóriu monitorizasaun durante Eleisaun Antesipada 2018 hodi entrega ba instituisaun relevante atu  hadi’a di’ak liután.

Relatóriu ne’e sita liuliu kona-ba krime eleitorál, involimentu labarik iha kampaña partidu polítiku, edukasaun sivika ba votante no seluk tan.

Prevedór Diretu Umanu no Justisa, Silveiro Pinto Baptista, bainhira ko’alia ho jornalista sira iha Kaikoli, ohin. Foto Egas Cristovão

Prevedór Diretu Umanu no Justisa, Silveiro Pinto Baptista, hateten relatóriu ne’e husu ba Sekretáriadu Tékniku Administrasaun Eleitorál (STAE), Komisaun Nasionál ba Eleisaun (CNE-sigla portugés), Ministériu Administrasaun Estatal, orgaun soberanu sira atu oinsá hamenus númeru partisipasaun labarik iha kampaña, uza patrimoniu Estadu iha kampaña, edukasaun sivika ba votante, krime eleitorál no seluktán.

Ba Funsiónariu Públiku ne’ebé uza patrimoniu Estadu iha kampaña EA, PDHJ sei entrega relatóriu ba Komisaun Funsaun Públika (KFP), Ministériu Públiku (MP) no Komisaun Anti Korupsaun (KAK).

“Ami nia relatóriu ne’e sei notifika funsionáriu sira ne’ebé naran tama iha lista uza patrimoniu Estadu hodi halo kampaña ba Komisaun Funsaun Públikaʺ, dehan Prevedór Silveiro Pinto iha salaun CNE Kaikoli.

Ajente Estadu hirak ne’ebé PDHJ nota mak ho profisaun profesór, médiku no servisu administrasaun, no sira seluk iha ministériu relevante ne’ebé servisu iha nasionál no munisipál.

ʺLista  funsionáriu públiku númeru boot, maibé ha’u la serteza hira maibé lista ne’ebé ami sei hato’o ba funsaun públika hodi loke prosesu númeru boot liu 100 resinʺ, hatutan tan.

Rezultadu eleisaun foin lalais, tuir sira nian haree povu barak iha área rural seidauk ezerse diretu hodi hili ho di’ak, tanba ne’e STAE tenke halao edukasaun sivika ba votante.

ʺIta rekomenda mós ba STAE bainhira iha edukasaun votante tenke barak ba komunidade iha area rurál para fasilita bainhira ba vota, tanba esperénsia foin lalais votante balun vota ona partidu ida depois sei asina tanʺ, realsa PDHJ.

PDHJ Simu Keixa

Alende ne’e PDHJ mós simu keixa hosi komunidade kona-ba violasaun diretu umanu no governasaun di’ak ne’ebé komete hosi funsionáriu públiku hamutuk 186 durante janeiru to’o inisiu jullu 2018.

“Keixa sira ne’e ami simu barak liu liga ba PHDJ nia servisu diretu umanu no boa governasaunʺ, adianta.

Keixa ne’e rejista maka’as liuhosi kapitál no munisípiu seluk hodi prosesu tuir lei. ʺKeixa sira ne’e barak hosi komunidade hasoru ita nia membru Polísia Nasionál Timor-Lesteʺ, afirma.

Silveiro haktuir keixa ne’e aprezenta ona ba parlamentu no sei entrega ba instituisaun relevante hodi prosesu tuir lei antes mandatu remata iha outubru 2018.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here