24 Jullu, Maria Vitória Kompete Iha The Voice Portugal

0
1404
Maria Vitoria (Marvi) bainhira fila hosi Indonézia hafoin tuir kompetisaun muzika Dangdut iha estasaun televizaun Indosiar. Foto dokumentasaun Tatoli

DILI, (TATOLI) – Artista juniór Timor-Leste, Maria Vitória (Marvi), segunda ne’e (16/7), aranka ona ba Portugal hodi kompete iha The Voice Portugal ne’ebé sei hahú iha 24 jullu, tinan ne’e.

The Voice Portugal ne’e kompetisaun múzika ne’ebé organiza hosi empreza SHINE iha Portugal ne’ebé inklui artista sira hosi nasaun seluk.

Maria Vitória nia prezensa iha eventu refere hetan suporta hosi empreza ida hosi Portugal ho naran Shine Iberia Portugal, Unipessoal, Lda.

Marvi nia estadia iha Portugal hetan akompañamentu hosi Ana Gomes, jestora ida ne’ebé akompaña Marvi dezde kompetisaun Dangdut Academy Asia 2 (DAA2) iha Jakarta, Indonézia, tinan rua liu-ba (2016). Marvi to’o iha Lisboa, Portugal, iha 18 jullu no sei fila hikas mai Timor-Leste iha 26 jullu.

Prezidente Assosiasaun Múzika Timor-Leste (ALMAMOR), Henrique do Rosario “Waiwatu”, hateten bainhira rona oportunidade ne’e, ALMAMOR orgullu. Ne’e duni, ALMAMOR fasilita kedas kartaun rekoñesimentu ida ne’ebé konsidera Marvi nu’udar artista Timor nian para lori ba Portugal nomós fó apoiu morál.

“Hosi ALMAMOR nia parte maka ami sente Marvi hanesan únika artista ne’ebé ho jestora ne’ebé maka di’ak, tanba bele halo promosaun efetivu ba Marvi, kontrola Marvi atu bele iha disiplina ba kanta”, Henrique hato’o ba Tatoli iha Aeruportu Internasionál Prezidente Nicolau Lobato Komoro, segunda ne’e, hafoin akompaña Marvi ba aeruportu.

Nia dehan esperansa ALMAMOR maka oinsá Marvi hatudu talentu ne’ebé furak no manán iha kompetisaun refere.

Enkuantu, artista seniór, José Freitas “Pai Zé”, tenik hanesan artista tenke prepara án, labele hein to’o kompetisaun mosu maka involve, maibé lor-loron ka oras ba oras tenke prepara kondisaun, nune’e hetan konvite ruma bele prontu ona atu kompete.

“Ita haree Maria Vitória (Marvi) iha kompetisaun Dangdut Academy Asia 2 iha tinan rua liu-ba, ne’e dalan ida oinsá Timor ne’e ema koñese iha Ázia. Agora, nia (Marvi) iha pasu ida tan tanba hakat fali ona ba iha Europa (Portugal) entaun ita iha ona timoroan ida para bele hamorin Timor iha Europa”, haktuir.

Nia hatutan Marvi iha insting kompetisaun ne’e maka’as teb-tebes no sei lori Timor-Leste nia naran morin iha Europa.

Nu’udar aman, António Borges, dehan orgullu ba Marvi nia jestora no ALMAMOR ne’ebé buka dalan ba Marvi atu hakle’an ninia talentu dala ida ne’e tan iha estranjeiru.

“Ha’u nia esperansa maka nia ba tuir kompetisaun iha The Voice Portugal bele ultrapasa faze audisaun ninian”, dehan.

Jornalista: Xisto Freitas

Editora: Rita Almeida

HUSIK IDA HATÁN