Sekretáriu Estadu Formasaun Profisionál no Empregu (SEFOPE), Julião da Silva no Diretór Jerál SEFOPE, Paulo Alves. Foto SEFOPE.

DILI, (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, fó ona orientasaun atu halo avaliasaun ba sentru treinamentu vokasionál sira ne’ebé hetan ona akreditasaun, bainhira sentru sira ne’ebé laiha kualidade maka sei taka.

“Ita lakohi fó sertifikadu de’it depois sentru treinamentu ne’e barak, mas joven sira ne’e barak mak dezempregu”, hatete nia iha Kaikoli, ohin.

Governante ne’e hatutan: “Ita haree kuantidade sentru formasaun no númeru reál ne’e lahan malu, ne’e sé mak sala, ida, ita fó akredita mak sala, rua, sira ne’ebé mak akredita ona ne’e lahala’o sira-nia misaun”.

Tanba ne’e solusaun ne’ebé iha atu halo mak husu sentru treinamentu akreditadu sira ne’e tenke serbisu maka’as no seluk mak tenke taka. “Taka depois númeru ki’ik para Governu ne’e ulun lalika moras para investe iha sentru formasaun sira ne’ebé iha vontade di’ak”, katak.

Diretór Jerál SEFOPE, Paulo Alves, hatutan sentru treinamentu akreditadu iha 25 ne’ebé loke ona iha Timór laran bazea ba akreditasaun ne’ebé Institutu Nasionál Dezenvolvimentu Mão de Obra (INDIMO) fó.

“La’ós fó akreditasaun ba sentru sira ne’e, maibé no fim sentru ne’e bele akredita ema no prodús ema bele liga kedan ba nesesidade indústria nian. La’ós ita akredita de’it depois sira hetan tiha graduasaun ema sira ne’e merkadu lauza”, tenik tan.

Nia realsa sei halo kritériu rigorozu para halo akreditasaun, karik sentru ne’e merese duni tanba ema ne’ebé prodús bele responde nesesidade merkadu rai-laran no li’ur.

Tanba Timor-Leste la’os haree de’it ba indústria rai-laran, maibé haree mós indústria esterna hanesan ASEAN, tanba futuru bainhira tama, preparadu no timoroan la’ós atu reponde serbisu iha país laran de’it, maibé bele bá internasionál.

“Kuandu sentru sira ne’ebé akreditadu ona, sira prodús laiha kualidade ami sei halo avaliasaun rigoroza ida liuhusi INDIMO sei taka sentru sira ne’e, sira prodús ema, ema sira ne’e labele responde nesesidade merkadu”.

Maibé antes atu taka iha buat barak ne’ebé mak tenke avalia. “Kestaun ne’e la’ós loke-taka, maibé haree ba kualidade, sistema ne’ebé estabelese sentru nia fatin tanba INDIMO ne’e instituisaun ida ne’ebé mak atu halo akreditasaun de’it, haree sira-nia kurríkulu, materiál sira ne’ebé hanorin, aula teoria ne’e porsentu hira, prátika hira? Bazea ba sira ne’e hotu mak ita foin halo akreditasaun la’ós naran haree sentru ne’e ita akredita”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here