Prezidente Parlamentu Nasionál, Arão Noé, ka’er liman ho Xefe Estadu, Francisco Guterres Lú Olo, ohin, iha Palásiu Prezidente da Repúblika, Bairru-Pité.

DILI (TATOLI) – Ohin Parlamentu Nasionál (PN) haruka ona proposta pedidu urjénsia governu da-ualu nian kona-ba levantamentu fundu petrolíferu nian ba Prezidente Repúblika, Francisco Guterres Lu-Olo.

 “Ohin Prezidente Parlamentu asina proposta lei ba levantamentu fundu petrolíferu nian no loro kraik parlamentu sei manda ba Prezidente Repúblika hodi bele haree dokumentu ne’e,” Vise Prezidente Parlamentu Nasionál (PN), Maria Angelina Sarmento ba jornalista sira iha PN, ohin.

Nia hatutan, Parlamentu haruka dokumentu proposta urjénsia ba Xefe Estadu, Lú-Olo, atu halo promulgasaun ka veta, tuir kompeténsia Prezidente Repúblika nian.

“Di’ak liu tan Prezidente Repúblika promulga iha tempu badak, maibé sé veta karik, presiza tan tempu ka loron 30 hodi halo konfirmasaun fila fali,” nia esplika.

Parlamentu Nasionál (PN) liuhosi reuniaun estraordinária iha Sesta kalan (20/7), aprova ona proposta lei husi governu, konaba autorizasaun estraordinária ba realizasaun transferénsia husi fundu petrolíferu (FP).

Aprovasaun Proposta lei nú 1/V/1­­­­­­­­­­­a, iha votasaun finál global ho rezultadu votu afavor 35, kontra 25, no abtensaun 3.

Proposta lei ne’e kompostu husi artigu tolu ne’ebé iha artigu 1 objetu esplika konaba intensaun husi proposta lei ne’e.

Artigu 2 konaba substánsia ne’ebé husu autorizasaun ba realizasaun transferénsia husi FP ba konta estadu ho valor milliaun US$140. Hahú husi lei ne’e entra em vigor no esplika transferénsia ne’e obrigatoriamente integradu iha Orsamentu Jerál Estadu (OJE) 2018, no ninia justifikasaun sumária sira,

Ikus liu artigu 3 konaba entrada em vigor no produsaun efeitu. Husi artigu tolu ne’e sei iha redasaun finál, antes atu lori ba Prezidente Repúblika halo promulgasaun no publikasaun.

Ministru Reforma Lejislativa no Asuntus Parlamentares, Fidelis Leite Magalhães esplika parte governu avansa ho proposta lei ne’e tanba laiha kobertura legal ne’ebé forte ba governu atu transfere osan hodi finansia duodecimo, tanba ne’e mak governu hanoin presiza autorizasaun husi parlamentu.

“Buat ketak ida kuandu governu informa mai parlamentu, atu rekorre ba rejime duodecimal bainhira osan iha hela”, Fidelis argumenta.

Tuir Ministru Fidelis, situasaun ida agora governu enfrenta mak osan iha kofre estadu falta de’it US$ 20 millions, no sei la kuidadu governu bele hetan balansu negativu.

“Tanba ne’e atu finansia atividade iha fulan Jullu no Agostu mak ami husu ba ita boot sira, tanba ita iha rutura ida ne’e,” Fidelis argumenta ba Deputadu sira iha Plenária.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here